EĞĞT-AΓ

Eğğt-aγ abrid a nelḥu
Tanfem-aγ a nessefru
Γef wayen iγ-yettḥazen

Eğğt-aγ a nebdu
Tanfem-aγ ad naru
A d-nini tidett yeffren

Eğğt-aγ a necfu
Tanfem-aγ a d-neḥku
Γef temsalt i γ-iceγben

Ulac win ur nettru
Neγ win ur nessin εeggu
Ala widak yemmuten

Ulac win –d-yekren iteddu
Neγ win ur ntettu
Σedlen merra medden

Ulac lehlak ur nḥellu
Ala win yewwin ddaεwessu
Lewḍa a s-tuγal d asawen

Ur qqebleγ ad refdeγ acengu
Neγ ḥed fell-i ad yettsuγu
A s-mleγ abrid iḍulen

Ur qqebleγ yir aqerru
Neγ tamsalt ur nferru
Ala ayen ẓẓiden

Ur qqebleγ i lḥerma-w ad tebru
Neγ nnif-iw ad yemḥu
Temẓi fell-as ad tt-nerhen

Yibbas ad tefru
Yir taγawsa a tt-nesfu
Ussan fell-aγ ad ifsusen

Islam BESSACI