Affar d ugerninuc
Affar d ugerninuc
Di sin d imγan
Igemmun zdat waman
Ma di tectilt mgaraden
Yiwen, ixef-is iḥemmel igenwan
Yezmer ad yettu iẓuran
Akken ad yali d asawen
Wayeḍ ileḥḥu tikli izerman
Lqaεa, lqaεa kan
Iḥemmel ad ikess ayla n medden
Anisa yekka yeǧǧa iẓuran
Yeεfes γef win yellan
Yuzzel ad yaγ anida-nniḍen
Yiwen wass deg wussan
Γef wakken i d-nnan
Lḥal d ccetwa
Fell-as yeγli-d yiḍ
Laẓ, asemmiḍ
Γer gerninuc yewweḍ yeεya
Affar yettru yettεeggiḍ
Ttxilk a gma ma ur iyi-teǧǧiḍ
Ad nseγ γur-k ar azekka
Yerra-yas-d awal sufella
D acu i k-yeṭṭfen ar tura
Almi ur tennejmaεeḍ ara
Kcem-d ar d-yali wass
Iγaḍ-it, yefka-yas tasga
Ur d as-tewqiε deg wadda
Ma d unnig γur-k xḍu-yas
Yekcem, yečča, yesseḥma
Yesteεfa, iger aẓeṭṭa
Yeqleε tilisa
Axxam, iεawed-as llsas
Agellid εeǧbent-as tirga
Netta s ujemmaε yeksa
Yerra iḥerqan d ayla-s
Gerninuc yeṭṭeṣ ar azal
Iγil sseεd-is mazal
Yemmekta-d γur-s inebgi
Iluεa-t s tiẓeṭ n wawal
Kker fell-ak iruḥ lḥal
D lweqt ma ad tebduḍ tikli
Affar yedha di lecγal
Deg usemγi d wuẓu yettḥawal
Ur yestaf ad as-yerr tiγri
Ninuc γef wayla-s yenceγγal
Lxir-is yewwi-t γer ccwal
S laman yuγ tiyiti
Yedda s tezdeg d uwenneε
Ur yuḥtam ad yettwaxdeε
S lγiḍ iqubel-it yenna:
Ma ilaq ad ak-d-ṭṭfeγ lejmeε
Neγ tebγiḍ ad nemcaraε
Akken ad iyi-teffγeḍ si lḥara
Amek almi nekk yid-k nemlal
Σni yewwi-ik-id uḥemmal
Neγ d tazerraεt-ik i d-yeddem ubeḥri
Tbaneḍ ur tesεiḍ azal
Tesṭuqqteḍ fell-i awal
Tettuḍ tewwḍeḍ-d iḍelli
Tcerḍeḍ-d fell-i lmuḥal
Tebγiḍ ad ak-ffγeγ akal
I yi-d-yeǧǧa baba d jedddi
Fiḥel ad nessiwel i lεeqqal
Fiḥel nekk yid-k ad nemcaqlal
Abrid n lḥeqq a t-nawi
A tt-nefru s tin n leḥlal
Ad neḥseb iẓuran acḥal
Wi yesεan aṭas d ayla-s leqwaεi
Ccah deg-i yettamnen
Bu yiles ẓiden
Ur ssineγ wi t-ilan
ḤMED LEḤLU