Kraḍ (3) isefra sɣur : Yusef Ɛcuri
TAWENZA
Ay abernus a bu usaru
A winna teẓḍa yemma
Ata wul-iw yettnujju
Am teflukt tewwi lmuja
Acḥal d aseggas tettraju
Akken ad teḥḍer i tmeɣra
Ur iyi-iɣaḍ ur iyi-yerzi
Am temẓi tɛedda ur faqeɣ
Ur nfureṣ ur nezhi
Ur ukiɣ segmi tt-furqeɣ
Medleɣ allen-iw lliɣ-tent
Ufiɣ-d iman-iw d amɣar
Tizzya-w ttwaliɣ-tent
Zhant ur sɛint aḥebber
Atentad s warraw-nsent
Nekk yal mi tt-bniɣ texṣer
Tlatin d aseggas di leɛmer-iw
Ur rriɣ agelzim s axxam
Ur ssferḥeɣ lwaldin-iw
Ɛzizen i yi-d-irebban
Imi i tent-uɣeɣ di rray-iw
Rniɣ ddeɛwessu imawlan
Akka i s-yehwa i ẓẓher-iw
Yessen ur iyi-yemli iberdan
A nnger n wasmi i luleɣ
S lbarud d teɣratin
Iɛdawen n wexxam-nneɣ
Ḥeznen mmuten s tismin
Yemma tefreḥ mi meqqreɣ
Tɣil dayen ur tettmeḥḥin
I jjwaǧ-iw tessaram
A d-lseɣ abernus-nni
Assen ad yeḍwi wexxam
Tarwa-w a tt-id-trebbi
Yexṣer wayen tessaram
Lweqt-agi i d amesbaṭli
A yemma ɛfu-yi si lǧiha-m
Ayagi d lmirad n Rebbi
Dɛu ad ṣeggmen wussan
Ad yekfu lhemm fell-i
Xas ma ur k-lsiɣ i tmeɣra
Xas ma ur zuxxeɣ yes-k
A k-lseɣ assen s aẓekka
Assen ad meṭleɣ yid-k
Wehran ass n 16 Yulyu 2000.
Yusef Ɛacuri
LWERT
Teqqel-iyi teɣzut d lbur
Rriɣ-tt i lehḍur
Ẓẓelṭ d uḍebbeq ifassen
Zik tettak-d lxir s uɛemmur
Lexrif d uzemmur
Asmi llan wid tt-iḥerzen
Tura s kra din yeqqur
Amadaɣ d uhicur
Fell-as yeɣli-d leḥzen
Lemmer ssneɣ ad sedduɣ lumur
Xas ma nekk d aqrur
Yili cawreɣ widak yessnen
Imi rray-iw d bu leɛrur
D nekk kan i iḍurr
Ḍṣan icenga fell-i
Wehran ass n 17 Yulyu 2000.
Yusef Ɛacuri
CCLUC
Tasa tekfa, ifadden kkawen
Ur nesɛi amɛiwen
Tarwiḥt deg iɣeblan tekcem
Ccluc i izedɣen ibawen
Yessemɣi-d acciwen
Yeqqel d ačaqlal ɣef medden
Si tẓegwa ɣaben yizmawen
Qqimen-d wuccanen
Ɣilen d nutni i d-iḥerren
Iruḥ yibiw ɣer lqaḍi
Ɣef ccluc ad yeccetki
Aṭas i iɛedda tilas
Amek iga wayagi
Lbaṭel ɛinani
Tura neɛya di txidas
Ttxilek a sidi
Ma ad tiliḍ d aḥeqqi
I temsalt af-d tifrat
Ccluc atah yezdeɣ-iyi
Yal ass itett deg-i
Atah lǧehd-iw yekfa-t
Ur yettxelliṣ lekra
Tagella-s tella
Atah weffad-iw yečča-t
Ma d nekk ur zmireɣ ara
Ttxilem a ddula
Ɣef lḥeqq beggen-d tafat
Yekker lqaḍi yerfa
I tessirt yenna
Ssemsed iɣuraf-im
Tissirt mi d as-tesla
Anɛam i d-tenna
Xas rryac-is d aqdim
Imi ur yettxelliṣ lekra
Lqanun yella
Nekkni nteddu s lḥeqq
A t-id-nawi di berra
Neɣ a t-nekfu merra
Ma ur yemmut ad inafeq
Tekker tessirt m iɣuraf
Ɣer ibawen s zzɛaf
Terra-ten akk d iftaten
Tɣil d rray axlaf
Axxam n ccluc texla-t
Yemmut ur yeǧǧi imwerrten
Ccluc ur yettwaṭṭaf
Yenṭew am welqaf
Yufeg yuli d asawen
Akka i tḍerru d iɣerfan
Ur nesɛi izerfan
Mi ara inadi ɣef tlelli
Ur yeḥṣi ur yuḥtam
D azaglu i s-d-rnan
Lmut tewweḍ-d ɣer yiri
Aṭṭan ma yekcem tafekka
Ad yezdeɣ dinna
Ma ur tesɛi imḥaddan fell-as
Ulayɣer ma nerra ddwa
Yif leḥder leqḍa
Wala ṭṭbib bu tkerkas
Wehran ass n 06 Yulyu 2000.
Yusef Ɛacuri