Anwa-t Belqasem Iḥiğaten?
Att-tafem Tadiwennit n Belqasem Iḥiğaten da: Tadiwennit n Belqasem Iḥiğaten
Tamusta n isefra
Ala
Ttif wi ifuden ur yeswi
Wala wi iṛwan di lmejṛa
Ttif argaz ur nelli
Wala win tga tmara
Ttif inig i yiri
Wala tamεict di lmerta
Ttif lḥebs tilelli
Γef wi ur nezmir ad yini “ala !”
ḥafi
Neffeγ tamurt s tsusmi
Xas ma d lεib tarewla
Tewwi-d ad neddu ḥafi
Neffer tirkiḍt n lğeṛṛa
Nugad fell-aγ ad d-yezzi
Wemrar i temgerḍt la ḥya
Γer deffir tedda tmuγli
Tili ma ur d-tbiε ara
Newweḍ almi nuggad lewhi
S lxuf i d-teğğa tmara
Nnhati
Tella lmut yugaren lmut
D lmut i d-teğğa tsusmi
Yeṛtaḥ wergaz ma yemmut
Wala wi iggaren nnhati
Deg ugerjum yugar ṣṣut
Deg wul ay tedder tiγri
Ma yenna-d yugad lmut
Yeglu s uẓar d tirni
Adfel d llufan
Yewwet wedfel d amellal
Ammus ur yuklal
Yecbeḥ wudem-is i tmuγli
D llufan mi ara d-ilal
Zeddig d aderγal
Ul-is d ddheb ur nefni
Tudert tettbeddil leḥwal
Wa ad as-izid wawal
Wayeḍ d dderz n tikli
Seg wawal γer wayeḍ
Menyif
Menyif taεkemt γef tuyat
Wala ul yezgan yeččuṛ
Menyif taqawajt tekkat
Wamma γef umeẓẓuγ yir lehduṛ
Menyif ajṛad ma yečča-t
Wala amgud ma yeqqur
Menyif inig ma yura-t
Wamma tudert ddaw leeruṛ
Tamussna
Teweeṛ tmussna i tussna
W’ur nuriw werğin yenki
Yewεeṛ yisem n tirrugza
Yeshel γef win ur nelli
Adrar yettban d taγezza
I wemdan werğin nuli
D acu-t wennar di ṣṣeḥra
I win yeẓẓlen di tili
Tissegnay
Seg usennan γer tmellalt
Seg tmellalt γer tyaziṭ
Lemtel-a medden akk slant
Ahat ula d kečč teẓriḍ-ṭ
D ddud i tsegnay ma snant
I win iwumi tεedda tiṭ
Lbaṭel yebda walan-t
Ass-a yeggra-d tetteiciḍ-t
Aqḍaε
D tayri-nni γef nedderγel
Ay neḍfer nugi ad tt-neqḍeε
D temẓi nsukk s idikel
Ay neğğa tugi ad d-teqḍeε
D ayen nugad γef i nerwel
Ay nufa deg widak neqḍeε
Yemxallaf beṛṛa γef daxel
Yezga wul deg umqelaε