A kra i mu zeddiget lḥila


Ireqqasen n temrilt kkaten deg uqaruy-iw
Akken id ttaz lmut-iw
Ggulleγ ar d-akud ar t-sbeddeγ
Ayen riγ a t-geγ
Igellil ad yaγ nnuba
Imcumen ad eγlin tura
A nedder ad nzeṛ talwit
Ur nettḥebbir i tmeddit
Anda i nebγa i nerra
Llawan ger ifassen i yella
Ur d-qqimen-t tlissa
D atmaten akk i nella

Agemaḍin as tesleḍ i wreqqas
Yekkat amzun d tisuqqas
Ah! kra din yehruri
Akud daya iγ d-yewwi
Ay atmaten ur zmireγ
Sureft-iyi, aken-ğğeγ
A kra i mu zddiget lḥila
M''ur t-qqarεem ma yella kra.


..............................................................................................

Yir tameddit


Ṭṭfeγ-as addud i tikti tgguma ad tilli
Deg allaγ-iw ttadren-t ttalin-t
Yella kra i yinessren
Ansa nekka d assawen
D Aqbu neγ d at yIraten
neffeγ abrid, ur neffiγ ara abrid?
ixf-is andalat, wissen m''ad d-innunet
yella kra i γinessren
issurifen, uguren
tinekkriwin, iγelluyen
tikli tella, aggwaḍ ur yelli
ad as d-nales s wadda
yella kra i γinessren
melmi, aniwi, i tmussni?
nzzarb-itt-id fellaγ
d imazzuciyen, d issadiyen i nella
nsentay isegnan degneγ
d awezγi w''ara d-yinnin nuḍen
nekkni yella kra i γinessren
akal si n-ga ur yefṛiz ara
anaqel ur t-nessin ara
nderγel, nbehba, nḥemmel aya?
yella kra i yinessren
deg allaγ-iw ttallin-t ttadren-t
tikti yuεr-as waddud tikkelta
uggadeγ ad t-mmet ur tt-nwala
ad d-tawweḍ tmeddit nneγ s lmγawla
imiren ad as nnini, aziγ
yella kra i γinessren, imi γ-teḍra akka!

Ğamal Saadi