I kemm
Suḍ-d ttxil-m ad sseḥmuγ, s ifuṛṛan d-yurew usemmiḍ!
Ger wagu-nsen m´akken a ttruγ, ad tenneγni tegnawt tettγiḍ.
Ma d aẓar n usirem a t-ssuγ, skud nnger ur yessiḍ.
Kemm mummu m´ur d-am-yemmuγ, tura atan ihi tesliḍ.
Riγ a d-iniγ s wayagi: Γef wayeḍ m´ur tedreγleḍ.
Qfel aseksut i tuggi, qim ulac anda ad teffγeḍ!
Ul-im ldi-t i inebgi, a kem-yerr amzun d tayeḍ.
Err inebgi d inigi, ad iẓer d netta i tḥemleḍ!
S tirga izegren tilas, i tγaltin tunḍa tesfeḍ.
Erran-t ula d iḍ am ass, amzun abriḍ ur yenneḍ.
Terram-t agur ger tullas, nekk yid-s netteddu s yiwen rkeḍ.
A tirga izegren tilas, teffeγmt xerṣum di lkaγeḍ.
Anṣuf yess-k ay asefru, d-ilulen s ddaw lγem!
Aqeṛṛu-w yid-k a tt-yefru, yessefk a k-id-yaf isem.
Ulayγeṛ amru ad yettru, ihi azwel-is: " I kemm".
S tsusmi i t-yura wemru, asuγu-s yugi ad yessusem
Essaid Ait Maamar