Tafat n tidet
I winna yegnen yurga tibḥirt-is am akken ur teqquṛ.
Yiwen ur d-as-yeṛzi targa yerna ur tt-yekcim wemqerquṛ.
Tameddurt γur-s twenneε, yedha s tunṭict n wuḍan.
Tibḥirt tefka-d nneεnaε, swan yeqjan imuḍan.
♠♠♠♠♠♠
Walaγ azekka-s yesselqaf, teṭṭef-it tawla deg tasmuḍin.
Yesla i tmettant tesseglaf, iḥebba tasumta umuḍin.
Yeγli-d lqut seg igenni, wa d aεwin-ik ay allaγ.
Ay afus axx issegni, deg ticcert n tistent, ssufeγ!
♠♠♠♠♠♠
Tedduγ deg iberdan n tmurt, d tin i d tiẓgi yerγan.
Wa d amedya ay ul aru-t, sell i ujeεjeε n yesγan!
Bu-xenfuc yeffeẓ am arezg-is, ifeṛṛağ d netta i sen-yettεerrin.
Ad tiniḍ deg uqelmun-is, izedlent yakk tsekrin.
♠♠♠♠♠♠
Imi-s yesluttuḥ ma yezzaḍ, d ifuraẓ i d-iγellin.
Amzun deg iciwi-s tiyuzaḍ, i yesrusunt timellalin.
D rrebrad tamuγli n leḥyuḍ, ssakden-iy-id, frawseγ.
Ay azrem γef uεebbuḍ mi tleḥḥuḍ, ulin akka i ten-id-ssawḍeγ.
♠♠♠♠♠♠
Ula d nekk walaγ widak iεellmen timellalin, ssawḍeγ-d timγaṛin icerḍen inyiren-nsent.
Ccfiγ γef widak-nni iḥemmlen ad zzin asfel i iqeṛṛa-nsen. Llan daγen widak yettaṭafen aqeccaḍ deg imi mar a ttxiḍin tifawtin deg leεwaceṛ i iceṭṭiḍen llsan γef teglimt-nsen akken ur ttεeddin ara fell-asen izaylalen.
Ssneγ daγen ataṣ n yemdanen ur xeṭṭunt ara temqessin n tmussni seg ifassen-nsen.
War ma ttuγ widak-nni icennun ccnawi ijadarmiyen, qqaṛen i wulawen-nsen: Anef-aγ a necḍeḥ, a nhuz tiqesṛiyin-nneγ ula d nukni! D ayagi kan i nerbeḥ yerna s waya kan i nezmer a nettu azekka aberkan.
Ur ḥemmlen ara yakk ad sslen i umedyaz, acku qqaṛen-as wahi γur-s ḥala lemgaḥel d ujajiḥ n tmes.
Ur ḥemmlen ara ad sseḥmun s yiṭij n wul-is, dγa fernen ccnawi ijadarmiyen.
♠♠♠♠♠♠
Ay ul fkiγ i uẓebluc, ssefsi-t neγ a k-yessens times!
Γas leqdic-iw s uxenfuc, s yess-k i yettemḥiḥid yiles.
Asirem rran-t d alelluc, anyir n uḥulfu yesbek.
Win k-yesbezgen a γ-d-iṛuc, a win ur nečči times γef yedles.
♠♠♠♠♠♠
Azaglu yetteddu εeryan, tamuγli tettberriḥ abbuh!!!
Yessefqad-aγ-d s iduynan, netta yeqqaṛ ṛxu, nukni mmuh !
Ma d lmut, d ussan neγ d uḍan tettawi ur teqqarṛ dayen.
Tfreffed s wallen tt-yexḍan, tettadam widen γlayen.
♠♠♠♠♠♠
Tawaγit yal ma tt-id-sḥedṛen yemcumen, qqaṛen: ur ttrut.
A yemma i yessnen ad hedṛen, akken d-as-reglen i lmut!
Γas qlen d uḍan wussan, nebred maca ur nettnudum.
Ad nγez igeḍyan s usennan, s tnifift ad d-nagem ahdum.
♠♠♠♠♠♠
Ad yeḍs imeṭṭi ageswaḥ, a s-neččaṛ tiṭ i wurrif.
Ay ul akka a nennecṛaḥ, amessak n weγrum ur γ-yeṭṭif !
Γef d ṭejṛa-s ur neεluleq, nḥemmel-it, deg-s ur neεciq.
Γas fell-as nezga nεewweq, ur nekkis i tselluft amḍiq.
♠♠♠♠♠♠
A tezdeg nerra d tayri, d kemm i neqqen d sṛima.
Zgiγ ssakdeγ lemri, εeqqleγ mmi-m a yemma.
A tezdeγ γunfan wiyaḍ, d yid-m ur zemḍen afus.
Ugaden a ten-id-subbeḍ, seg w´anda wwḍen s wammus.
♠♠♠♠♠♠
Unageγ ula d nekk rezfeγ, wwḍeγ almi d war tifrat.
Deg temsal tura feṛṛẓeγ, mellul yakk wul n tdellaεt.
Ayen ur nenuda nufa-t, neqqaṛ i weγyul, ssek!
Ffer anida i m-yehwa a tafat, ggulleγ a m-kkseγ aḥayek.
♠♠♠♠♠♠
Ungif ccah ma nesserfa-t, eğğ kan tiṭ-ik i usawen !
Ini i ubelluḍ γef tasaft, qceṛ γli-d s imawen!
Bu tirga nnegr-is yufa-t, atan ihi nniγ-awen.
S tidet i tettaγ tafat, γas teskar times deg ulawen.
Essaid Ait Maamar