Am wi yellan.
Lliγ am wi yellan
Ilul-d yebγa ad yili
Am uferṭeṭṭu deg iḥerqan
Yal ajeğğig fell-as yeγli
Am yetbir deg igenwan
Anda i s-yehwa ad iεelli
Am weslem deg waman
Am kra n wi yellan d ilelli
Lliγ am wi yellan
Di ddunit iḥemmel kullci
Kullec γur-s d aẓidan
Ccbaḥa fell-as tezzi
Yeččur wul-is d laman
Teddukel yid-s tayri
Asirem-ines d ameqqran
Taggara ur tt-yesεi
Lliγ am wi yellan
Ass-a ur ẓriγ d acu-yi
Ttwaliγ iṭij d aberkan
Aggur teğğa-t tziri
Seg igenni rewlen yetran
Tamment texleḍ d ilili
Ttemcabin akk iberdan
Ssufuγen γer uwezγi*
Lliγ am wi yellan
Si targit tura yuki
Lliγ am wi yellan
Ass-a ulac-iyi
D lexyal-iw kan i d-yegran
Yettidir nnig lebγi
Lliγ am wi yellan
Am nekk yiwen awer yili.
Ass n 16/ 08/ 06
* awezγi: lmuḥal.
**************************************************
Kullec d targit
Heddren-iyi-d f tnaṣlit
Umneγ ayen i d-qqaren
Ccbaḥa, lehna, talwit
D waṭas imenzayen*
Ddiγ yed-sen di targit
Kemmleγ deg webrid-nsen
Ad nleqqem aẓar n tjaddit
Ad neddukel d atmaten
Mi d-lliγ allen-iw f ddunit
Ufiγ-d abrid yessawen
Ayen i s-ttamneγ akkit
Ur yesεi amkan γur yemdanen
Am yiγed aḍu yettawi-t
Yezzuzur deg-s f wallen
Ayen yelhan γur-sen diri-t
D ayen n dir i uklalen
Ayen i γ-d-ḥekkun mi meẓẓiyit
Belεejjuṭ d tfunast igujilen
Qqaren-aγ ẓẓur, lḥeqq yeγleb-it
Ziγ tura d ayen nniḍen
Ẓẓur s wureγ nektal-it
Lḥeqq s wuzzal yeqqen
Tidet teččeḥ di tqernit
Tasga d lekdeb i tt-yeṭṭfen
Ula d tamment n tzizwit
Rẓaget d ilili i tt-yifen
Ukiγ-d f wudem n tṣebḥit
Ufiγ-d ussan-iw xerben
Ayen akk i εaceγ d targit
Zzreγ deg yiḍes iḍulen
Tewweḍ-d tura tmeddit
Tamsirt-is d tin ixulfen
Ass n 17 / 08/ 06.
* Amenzay/ imenzayen: Ayen s wayes nettamen d amenzu, ur nezmir ara a t-neğğ : principe (s).
************************************************
Ay itbir
Rzu γur-s ay itbir
Ini-yas attan bxir
D lxiq kan i tt-yesnuγnan
Deg wul-is yezdeγ lḥir
Tamuγli-s terra γer deffir
Ar wussan-nni iεeddan
Deg waktayen* ad tettceyyir
Gar-asen tettferfir
Tebγa ad tcuqq igenwan
Ay itbir...
Ini-yas ay itbir ttxil-k
Ul-is atan yehlek
Yezzer di temda n leḥzen
Yebγa ad yili yid-k
Ad yidir kan ar γur-k
S lefraq-ik yugi ad yamen
Yal ass ineddeh yes-k
Tarwiḥt-is tlul-d seg-k
Ussan bγan a s-tt-kksen
Ay itbir...
Ini-yas ur tezmir ara
Ad tekkes g wul-is leḥmala
D awezγi ad ak-tettu
Gar-awen yezga usigna
Fell-awen tmer-d lmeḥna
Yura fell-awen beṭṭu
Ini-yas mačči akka
Nettat i tenwa
Ad taḍen mebla ḥellu
Ay itbir...
Ruḥ ay itbir γur-s
Ini-yas attan tuyes
Deg wulac tettwali ṣṣifa-k
Lxiq itezzem deg-s
Di ṭṭlam tufa-t d amwanes
Yal ass ihedder-as-d fell-ak
Ini-yas attan weḥd-s
Ccwal yeddukel yid-s
Yerna-yas-d ula d lehlak
Ay itbir...
Res-as ay itbir f ṭṭaq
Ini-yas attan txaq
Tebγa ad twali udem-ik
Iṭij yal mi ara d-yecreq
Deg wul-is a d-yessenṭaq
Iḥulfan-nni n tayri-k
Yerγa wul-is yeḥreq
Yendef s lğerğ n lefraq
Yebγa ad isel i ṣṣut-ik
Ay itbir...
Res-as ay itbir f tewwurt
Ini-yas ma rẓaget lmut
I yerẓagen d lefraq-nneq
Yenna-yi lmektub ttu-t
Seg yesmektiyen-inem mḥu-t
Nniγ-as ur zmireγ
Yid-s kan i ssneγ tafsut
Tura tezzi-yi tagut
Akka mi fell-as beεdeγ
Ay itbir...
Ay itbir res-as g irebbi
Mel-as i yeḍran yid-i
Yugi wul-iw ad yettu
Yal tikkelt mi ara d-yemmekti
Yeqqar-as wissen kečči
Amek i k-yexdem beṭṭu
Ini-yas ay itbir dayenni
Aṭas i γ-tεetteb tayri
Amek ara neḥlu?!!
Ass n 19/08/06
*Aktay/ iktayen: Ayen i d-nettmekti: souvenir (s).