I kečč a dda Muḥ
Deg yisem-ik meṛṛa nessen, γas udem-ik yeffer tura.
Am arezg n imeγnasen yemmuten ur ẓrin kra.
Ttxil-k a dda Muḥ in-asen, γas akka mmuten,
deg ulawen i yefren i tufra!
***
Isem-ik tameddurt teṭṭef-it, γas tamettant teddem, tegla.
Dda Lmulud steqsi-t, s yess-k ma yella w´ur nesla!
Attah ihi tiririt: Yella yiwen yella ulac-it,
Yella wayeḍ ulac-it yella.
***
Aẓẓ γer Ṭahaṛ! Ad ak-yini: γas lemmer tessusmeḍ ad temteḍ.
Ṣubb seg at Yiraten d at Yanni, γef Lwennas tesfeqdeḍ!
A tin-tafeḍ a yettγenni, yezzuzun aqcic-nni,
Massnsen ad t-issineḍ.
***
Ddukel-t akken s umata, dlu-t γef Taweṣ Uεemṛuc!
Mar a ken-id-twali di tlata, amzun rzan fell-as yakk leεṛuc.
A wen-tesbuḥru s tciṭa, ulawen ad kkren γer tyita,
ur ken-itett ubeεεuc.
***
A dda Muḥ kečč tqedceḍ, deg tegrawliwin tesεeddaḍ.
Ula si Fṛansa trewleḍ, Buxeṛṛuba d aṣeggad.
Ẓriγ adaṛ-ik a t-yaweḍ, ẓriγ a t-reggmeḍ,
Ula deg uẓekka a k-yettagad.
***
Nuṛğa ṛebbi ur d-ifeṛṛeğ, kečč tewweteḍ di lğal-nneγ uzzal.
Udem-ik deg yal ul ifeğğeğ, γas akka iγum-it wakal.
Ay akal n taddart Uqawej, anef-as deg-k ad ifeğğeğ,
dda Muḥ di leḥder yuklal!!!
Essaid Ait Maamar