In-asen daγen ayagi

Anef a nderrez tameγra, a s-nefk tadwilt i tmendit !

D tagnitt n wurar tura, a s-ngerrez tameddit.

Taḍsa ad teffeγ si tuffra, ad teglu yid-s s talwit.

Am taẓult d ugusim, yes-m ul yennecṛaḥ.

Tiziri awi-d afus-im, anef-aγ a necḍeḥ !

♠♠♠♠

Igenni ččuṛen-t yitran ṭṭfen-as i waggur addud.

Ul iẓuran-is ḥlan, tazmert igerrez-as wafud.

γur-neγ ad ttaḍsan wussan, tadawsa anef a nsew neffud !

Ğğ-aγ a m-lḥeṛqus, a nwanes igenni !

A Tiziri awi-d afus, nekk yid-m kra ur d-aγ-yerni !

♠♠♠♠

A Tiziri awi-d afus, targit ad temlil lemri !

Asirem a s-yezmeḍ waggus, awal ad yeqqel i tiγṛi.

Yak tezdeg mačči d ammus, a d-nessaken azal n tayri.

Deg-m tezdeγ tafat, ilul-d yal d itri.

Anamek n tudert nufa-t, yes-m a tiziri.

♠♠♠♠

Γur-neγ tudert-agi ur telli, ma d allen s igenni rrant.

Ttganint tiziri ad teγli, a ten-terr s yes-s walant.

Γer tafat zegreγ tamuγli, ata rriγ-as tasusant.

D tikti nwen neγ d yelli, deg ulawen ṭṭsent, rkant.

♠♠♠♠

Ssarameγ kan ad akint, ad ffγent seg imawen.

Ad qedcent ad aγ-d-awint, tizeṭ ttargun wulawen.

Ssarameγ s tidet ad akint, deffir a nessegri asawen.

Tiqbuṛin ma yella ur rkint, yes-sent ifadden kkawen.

♠♠♠♠

Amenzay n tekta tiqbuṛin, yewwi-yaγ d yir abrid.

Imdanen tafat m´ur tt-ẓrin, d tilelli i yeqnen s lqid.

Si kra mmugren m´ur d-γrin, d allaγ i ibedden am lḥiḍ.

Neγ d tameddurt i wumi ur ssrin, ma d tawaγit γur-sen tettγiḍ.

♠♠♠♠

Tawaγit γur-sen tettγiḍ, neγ d tameddurt ur ssinen.

Ifuṛṛan-is a γ-ten-id-awiḍ ttxil-k ay akud in-asen !

In-asen i widak tewwiḍ, wid yennejlan a d-asen !

M´akken a d-asen ayen ur newwiḍ, imir-en a t-naweḍ yes-sen.

♠♠♠♠

Iswi-nneγ imir-en a t-naweḍ, s tunṭict ad aγ-d-awin.

Γur-sen a nεaned a neεreḍ, s wid yeffuden ur swin.

Γas tamda tluγ mi tt-nerkeḍ, a ttizdig m´akken a tt-rwin.

In-asen neẓra necceḍ ssaked-t s udem n tilawin !!!

♠♠♠♠

Essaid Ait Maamar