Yemma tger ulman tkettu, akken i s-tesselmed setti.
Baba iṛeddem seksu, d tikli ad iheggi imensi.
Wwiγ i weγyul ad isew, tafat deg udaynin texsi.
Dduqseγ kra mi d-yusew, ḍalleγ ufiγ d ttixsi.
♥♥♥♥♥♥
Imensi ihegga tura, sliγ i baba yessawel-aγ-d.
Ngum ad nemlil meṛṛa, deg ifassen-iw ssardeγ-d.
Ilefḍan d-wwiγ si beṛṛa, s tarda deg-sen kkseγ-d.
Baba yennecṛaḥ, imi ḥemmleγ tezdeg.
Yemma tenna a mmi yebbaḥ, ammus seg-s yufeg.
♥♥♥♥♥♥
I telha tegnitt am ta, annect tgerrez a lγaci.
Temlal-d twacult s umata, aγilif yessers lfuci.
Tura ulac tahin neγ ta, aẓet-d s tezmert-nneγ učči.
Ibawen-agi lhan, rnuy-id sseg-sen !
Yak aseqqi i ten-icedhan, yifi-t win ur t-nessen.
♥♥♥♥♥♥
Ntett, nettmeslay, nnsel, yal wa yečča, yehḍer, yesla.
Nekkes γef wulawen snasel, yal ul amuḍin yeḥla.
S tawant deg laẓ nkessel, tamendit s tayri i d-tella.
Dacu i d-iyi ğğan, imi ten-ḥemmleγ.
Imawlan ugaren amjan, d kra yakk ssneγ.
♥♥♥♥♥♥
Ihi yuγal yuder wass, akken nessader seksu.
Kkreγ ssardeγ tuγmas, baba yewwi-yi s usu.
Yecnay-id tizlitt n Lwennas, imseγṛet-nni n uγuṛṛu.
Kra yekka yiḍ ur ṭṭiseγ, ğğeddileγ deg yidis.
ḥareγ melmi a yimγuṛeγ, ad aγeγ abrid-is.
♥♥♥♥♥♥
Deg webrid n Lwennas, ad nessemγi tuεlac,
i twenza am ta ayen?
Temẓi yeqqes lweswas, tenna i uzaglu maεac,
ur k-nettaggad dayen.
Yess-neγ ad yali wass, iḍ a t-yeddem nnεac,
ad ffren wuččayen.
Nekkenti s tullas, nukni s warrac,
n tmurt n yeqbayliyen.
♠♠♠♠♠♠
Nesla di tmura n medden, ccix anida ur itedden,
wa ur yettṛuẓ i wayeḍ aqeṛṛu.
Ṛuccaγ-d a win sen-ibudden idles-nsen d wayen γuṛ-s icudden,
llan war amdan ma yettru.
Nukni γef teqbaylit a nedden, γas leḥyuḍ tura hudden,
lsas a t-nessali s wemru.
Tacḍat n dda Lmulud γ-iḥudden, yes-s a γ-gerrzen ifadden,
yes-s ad nṣeggem asefru.
♠♠♠♠♠♠
Yak terra-tt teqṛeḥ teqquṛ, telqeq iḥaren a timγuṛ,
idim yettawel, yettfuṛṛu.
Ul werεad d-ilul yeččuṛ, allen yelli-tent-id leγṛur,
tilin-nneγ tettduṛṛu.
γas ma tinzar d aγenjuṛ, akken ran ilin lehduṛ,
nukni ad nerfed s uqeṛṛu.
Nessen anida d-nesquccuḍ, ay amezruy ma tceffuḍ,
necna tizlitt uγuṛṛu.
♠♠♠♠♠♠
Essaid Ait Maamar