Cfan igenwan yeεlayen
Akken ma llan di sebεa
Ula d agur icebbḥen itran
Yusem imi ur tt-iwala
Zuxxent tliwa n waman
D nutenti i tt-id-yessekren
Iṭij izad-as can
D netta i s-yegan initen
Tekker-ed seddaw uleclac
Wi i yεeddan ur tt-ittwali
Tufrar-ed ger ysetma-s
Yal ta s cbaḥa i tewwi
Uzzu mechur-et rriḥa-s
ilili izad di cbaḥa
Nettat ur tebri i wayla-s
Xas akken ur terni kra
Yiwwa-s tufrar-ed tṣebḥit
Azal yelli tibura-s
Tufa-d iman-is d tawḥid
Tid i s-d-yezzin brant-as
Tebda tettawi s lewhi
S kra n tin yelhan tedda
Ma d nettat imi ur teswi
Ad tedder ad temmet di terga
Yewwet-ed uqebli yewwi-d
D tilγa n tidett i d-yuker
S yixef-is yesbedd-itt-id
Uqbel as-teknu i tewser
S ya usya luεan-tt-id
Ad tẓer azal i tesεa
Tafsut tessewzel abrid
Ajdim ur iğuğeg ara
Tadyant-im teẓḍa ur tewwiḍ
Iḥricen-is ddan d inzan
Cfan-am kemm ur teẓriḍ
Deg yiseγ i kem-id-ttadren
Aẓar seg wakal yewwi
Tirugza s i tbeddeḍ ass-a
Arεaud, lebṛaq, abruri
Kemmini ur tefkiḍ mayna
Farida Elğama ( At Harun ) Farida