Yess-k leεwanseṛ feggḍen, sefḍen takewt γef tmurt.
S yess-k aman yakk wwḍen, yal aẓar ngum yemmut.
S yess-k iḍ d-aγ d-yessawḍen, d wass tjeddel-it tagut.
S yess-k i nessen ayen nniḍen, i nesla awal n tugdut.
Tenniḍ ifuḥ bu wurḍan, tutlayt-is rrẓaget tḥus.
S yess-k s zzux nečča remḍan, yess-k nessared abeṛnus.
S yess-k i nergem iḍan, nergem agerfiw d uṭarus.
Γur-sen nerfed-d iḍuḍan, ilemmasen ur ten-nesrus.
I tecniḍ i d aγ-tenniḍ, ngum akud aγ-ifat.
Teskerḍ-aγ-d yakk m’ ur teẓriḍ, s yess-k i nwala tafat.
Neḍfer abrid deg telḥiḍ, amcum nezga nesserfat.
Amek a nili lemmer ur telliḍ, lemmer ur d-tluleḍ a dda Ferḥat?
A nedfeṛ lejfaṛ n Xeṛṛubi, a γ-yessentu issegni deg allen.
A neddu d watmaten Ṭwalibi, a γ-rren d iderγalen.
A γ-mmlen abrid γeṛ Ṛebbi, a sen-nnuγal d akraren.
A nkerrez, a njeddeb, a nettbibbi, s iqeṛṛa a nessuden iḍaṛṛen.
S yess-k i ẓiḍet tmeddurt, gar-aneγ asirem i yella.
Fell-ak nγunza tatut, ccna-k neṭṭeḍ-it deg umula.
D kečč i d asirem n tmurt, kečč a mmi-s n Illula.
Azaglu udem-ik yettkukrut, ay amaziγ imula.
Yid-k ulac ul ur necni, γef Gibara d Ḥasen Laγa.
Yasin fell-ak ur yenni, ameγnas n ccna almi yebγa.
Yess-k nerẓa ğğağ igenni, iswi njeddel-as ssbiγa.
A dda Ferḥat Mhenni, a Mandela n Tmazγa.
imyura.com ©2006