Remdan At Menṣur d mmis lɛeṛc At Σisi di taddart n Tizi Ibel (Hibel i tt rran waɛṛaben), d-amusnaw ameqran, zik d asalmad n takrura (la chimie) di tmanaγt n Lezzayer, Alger , d anemhal n tegmi di CNRS di Paris VI.
Maca tamedyazt d-tamγitt (vocation ) ines tis snat. Yura-d ya "Tiγṛi", γuṛ L'Harmattan,"Agani", γer Zyriad, "Isefra N at Zik" s γuṛ-s anida i-d-ijmeɛ ak isefra n zik i qaren leqbayel seg tsuta (génération= tasuta) ar tayeṭ bla aγ-d-ǧen isem imedyazen nsen.
Izlan i d iwwi deg idles ayi icerk-iten d leγṛuc i d izzin I Tizi Ibel am At Yani, At Yiraten neγ Iwaḍiyen.
Iferq-it γef kkuẓ (4) iḥricen :
Aḥric amezwaru isemm-ayas “TILUFA” iḥekku-d lemḥayen iḍerrun am yir jwaǧ, lefraq, tigujelt, lḥewǧ neγ aṭan
Amedya : Ttruγ, medden ddsen
Ay ttruγ medden ddsen
Xas nek ay teṛza tiyita
Axxam-iw iqqel d izem
Ufiγ as ddwa i lexla
A win i-y-d-yuznen lefṛaq
Efk ed ṣber i tasa
Aḥric wis sin “TIKTA” , d izlan id ǧan wid ijeṛben ddunit . Inna-d Ramdan At Menṣuṛ d aḥric anezfan nig wiyad a-naf deg-s tamusni, ṣbeṛ, tirugza neγ tagmatt.
Amedya : Aqlaγ la nteddu am lmal
Aqlaγ la nteddu am lmal
Ur yeɛlim ḥed s iman is
Albaɛḍ ibweḍ-as lmijal
Di saɛa ad iddu lɛameṛ-is
Ay tegg lmil di ddunit
Ziγ d aẓekka ay d axxam is
Aḥric wis kraḍ i semma-yas ṚEBBI, NNBI D LAWLIYYA”, ayen akk γef acu
ttamnen at zik.
Amedya : Wi ibγan a d iẓuṛ iṛuḥ
Wi ibγan a d iẓuṛ iṛuḥ
Izger lebḥeṛ di ccetwa
Isafen iγeẓṛan γur-s
Dinna a y teqwa lbaṛaka
Lǧennet a syadi tewɛaṛ
Deffir laɛtiba ay tella
Aḥric aneggaru “TAMEDDURT”, isdukl-ed ak ayen cennun medden di tmeγṛiwin (tibuγarin), deg usendu, di twizi uzemmur mebla ma yettu
izlan n tunḍa neγ ayen qaṛent temγaṛin i teksen ticerka.
Amedya : Tunḍa n lmelḥ
Yiwen, sin, tlata...sebɛa
Yiwen, sin, tlata...sebɛa
Wa d cfa, wa d ddwa
Lhem iffeγ γer beṛṛa
S l feḍl n Ṛebbi d bab n lqeḍṛa
Nnḍeγ ak lmelḥ s uyeffus
ɛinttu k a ttbedel affus
....
"Nessaram win i-sen-islan ar a–ten-yaru, win i-ten-yuran ( neγ
yeγṛan) a-asen-icfu"
Ar Tufat
Zahia.