 | | |  |
 |  |  | |
|
|
|
Ass n 25 di Yunyu : yeγli usalas Ass n 25 yunyu 1998 deg uzal, yeγli-d isal amessas n tmenγiwt n Lwennas Maεtub! D tameţţant i s d-yernan cayaḍ i wurγu! Tsekw-eγ ifadden!
Riγ ad d-awiγ a ṭ̣̣as n umeslay fell-as maca s nnig n wul imi tameţţant-is teggra-d d tabuciḍant. Am akken qaren wat-wawal: “Qeḍran ma yezwar s imi, tament ma teggra, iwumi?”
7 iseggasen ayaki mi yeγli usalas. Yeγli umedyaz maca taγect-is mazal-iţ teţbeεziq ar ass-a. Kra n temnaḍt anda tekkiḍ, kra n wedrum anda tzegreḍ a s-sleḍ i Lwennas. Lwennas d amaγlal(éternel) yezdeγ deg wul n yezwawen d wid i t-iḥemlen ger imaziγen s-umata. Tuγac-is daγen d timeγlalin.
Imeslayen-is d isufa, yessemsad-iten ţuγalen qedεit am ujenwi. D asemsed i yesemsad deg isefra. I yiman-is kan, ahat yeskefl-ed azal n imeslayen d yinzan iqburen i yeţwaţun ayen s-wayen aţ-čareḍ adlis neγ ugar.
Isefra-s mačči d tiwwin kan ay-wwan...naxen almi ţţuddamen.
Deg iseggasen-a ineggura fγen-d kra yedlisen i d-yeţmeslayen fell-as, imawlan nsen εerḍen, qedcen, nudan a d-skeflen ayen yellan d axatar di tudert-is maca...tudert n lwennas d taxatart akken ma tella.
Igerrez ma yella a t-id-neţmekti-d akka yal aseggas, xas llan a ṭ̣̣as n wid i s-yerran tajjmilt di tuγac neγ deg yeḍrisen nsen, isefk at-neḥrez di cfawat nneγ. Ad ğğeγ isefra-s ad meslayen, d agerruj ur nkeffu.
Seg wansa a nebdu awal af Lwennas, anda ara t-nfak ? awal af umennuγ-is mačči dayen ad iqid yiwen n wedlis neγ sin. teččuar-as send ad yesmir ayen awk yellan deg wallaγ-is.
Ur yelli ara seg icennayen-nni n zdiḥ u rdiḥ akken qaren, yezger akin ar teγmert nniḍen. D ameγnas ger imeγnasen. D afeḥli i tuγ yeţṛuẓen asalu. Yekka abrid ansi kkan ilelliyen send neţţa. D amadar(déscendant) n kra n igelliden-nni imaziγen igrawliyen ur nefki afus af wat-tmurt nsen.
Xas rẓaget temsalt-iw
Xas akka ifadden-iw εyan
Smesdeγ taγect-iw
A s-d-slen medden akken llan
Ur ţţakeγ afus af tmurt-iw
Aţ-ruḥ deg wecrurd n zman
....
Wid tuγ ssnent, ddukulen yid-s, zemren aγ-d-ḥkun fell-as amek i ţuγit d afeḥcuc u d aḥcayci(populaire).
Tadyant n tuber 88, qrib tegla s-iyes. Ewten-t s rṣaṣ waεraben, d akubbu i s-kubben aldun di tfekka…xas akken yeslek, yecḍ-asen i izukar ur yemmut ara.
Ma d ṛsaṣ i ineqqen
Aql-i u’ mmuteγ ara
Ma d lahlak I d-ixelqen
U’ yezdiγ ara
(...)
Ay ur rriγ aḍar
Ayen ibγun iṣar
Imi d leqbayel
Ama d lkumiṣar
neγ ağadermi lεar
Ur s-kniγ i ddel
Xelleṣeγ adrar s idammen-iw
Ad d-yeqqim later-iw
Xas ggulen ar d-at-sefḍen
Wid yeţţgnin di lmut-iw
Yessamasen isem-iw
Kul tizza ay-d-mlilen
Lwennas yerfufen(rfufen = neâtab) di tudert-is, yuzzel γef tugduţ, γef izerfan n wemdan, γef teqbaylit, γef idurar (d idurar ay d-lεemr-iw). Yeccna-tent akken ma llant, ur yezgil yiwet.
Yeccna idles, tutlayt, inaẓuren nneγ yeţwaţun, yeccna af dda Sliman d Si Mḥend u Mḥend
Ay imekta-d wul Sliman
D si muḥ u mḥend yefnan
Mmuten ur d-ğğin wara
Negren u Kul wa
Anda a s-rkan yeγsan
Sliman! atan iban
Aẓekka-ines atan di lγerba
(….)
Ay imekta-d wul Sliman
D lbaṭel fell-as yeḍran
Yemmut meskin d amengur
D tasa-w i ten-t-id-ijemεen
Ay tqeddeḥ igezm-iţ wat ṭ̣̣an
Aya nejmaεen daxel-is
Rebbi, amazzan-is d wat iččumar isik-iten-d ansi i yekka weγyul
Yeţmeslay akk d Rebbi, yeqqar-as:
Xas medden as-inin jehleγ
Yewweḍ-ed wass deg ak-sufγeγ
Ak-nfuγ seg wallaγ-iw
Si temẓi-w yis-ek ţamneγ
Mi guleγ yis-ek ur ḥenteγ
Teṭṭfeḍ tasga deg wul-iw
A ṭas ik-sebreγ fecleγ
εecreγ ak-ten-sweεdeγ
Bla lemziyya-k, kemmel lεemr-iw
Imseḥrasen aεraben ur ten-yeţţu wara, inekcamen-a i d-yeglan s lmuţ ar Tferka n Ugafa ur “sen-yesxas deg wamur nsen”. Iwḍen-d 14 tmiḍa ayaki, seγlin-d bu-berrak deg wallaγ n medden. Acḥal n wid ay nγan, acḥal n tmegg°raḍ s-wayes glan, acḥal n tlawin timaziγin i yenzan am wakraren di tmura taεrabin...
Muḥal ad fehmen
Ur ssefhamen
Laẓ d tilufḍa
I d actil-nsen
Ewwin-d aγilif
D icwura n lkif
Ar tmurt n lejdud
Gran-d asurrif
Glan-d s leqyud
N tektabt n lḥif
Lḥeğağ yeţţawin rrtiε yal aseggas akken ad d-γafren rebbi nsen, iseggem-asen-d yiwen usefru d awal kan. Xas ad leqmen seg-s i yseggasen ur inegger.
Yewweḍ-ed d sṣaḥ
Yewwi-d tesbiḥ deg ufus-is
S lemsabaḥ Mugrent-ţ teslatin-is
(…)
Sel-d a mm-i
Ak-d-iniγ dacu iγ-d-yenna
Yefka-d i nnbi tabraţ teččur d isefra
D Xumayni d Qeddafi
I d-yersen d ineggura
Imrabḍen n tmezgida, wid yerran iman-nsen d iḥbiben n nnbi, yeccna fell-asen
Aql-I dduriγ laεnaya-k
A ccix n taddart nneγ
Ur ţţagad af tferka-k
ţkel fell-i ak-ţ-ferseγ
Ur d-ţţaddam sselfa-k, s lbaraka-k
Berka-yi ad sqenεeγ …ur ifur
(…)
Di tliwa ad gganiγ
Aman ur k-ţ-xasṣan ara
Seg lğiha-k dacu i yerğiγ
Ay d-it-tekseḍ ccerka
Ufiγ ar tira iy d-turiḍ, a teţwaliḍ
Aql-in ččureγ-ak aḍellaε
Llant daγen tesfifin: llah wekber, a sidi εebd rreḥman... anda i d-izγen(zγen = critiquer). Aya ur sen-yeεğib i yenselmizriyen, swan qeḍran , iḥeṣl-asen usefru deg ugerjum yeggum ad yader. Deg useggas n 94, iwin-t irebraben seg wat-Ddwala
Amek almi iwḍen nγan izem am wa? Yeţewwet s waldun, ula d tamejjurt-nni ines tuγal am uγerbal. Nγan-t s ddγel. Ewten-t anda akken ur yegmin ara.
Inselmizriyen d iccenga n tudert, am iγerdayen anda ṭṭfen ur s-berrun. Ala “lğihad“ i yellan di tmelγiγt nsen. Win ur nelli yid-sen neγ am nutni a t-snegren.
Inselmizriyen gulen fell-as acḥal send tameţant-is.
Xas akken glan s tudert-is, Lwennas mazal-it
yeṭṭef tasga deg wul n yal aqbayli, tal taqbaylit i iḥemlen taqbaylit.
Ayen awk yekka di tikli-is werğin yenker iẓuran-is, idles n yezwawen yeţţader-it-id tal taγect.
Ur lliγ seg wid inekkren
laεwayed d tizeḍt n lejdud
Tamussni d wid ţ-yeţqelliben
a ţ-snerni yir leqyud
Amulli n 20 yebrir 1980 wer t-yezgel ula d aseggas. Ass-a d amulli n tmeţţant-is iγ-d-yesegrawen yal aseggas
A yafrux εjel γiwel
selem-iyi-d γef igawawen
ur zgal ḥed s uγafar
jsk d wid ţ-iḥemlen
Ul-iw icedha a ken-izar
ata yetqeleq lxaṭar
nezga nenfa d iγriben
(.....)
Di tesdawit a d-nemlil
80 a t-id-nesmekti
ad ewwet lğuher amendil
m id-dda tmaziγt-nni
Isem-ik a Lwennas yekcem amezruy n yezwawen. Ddu kan d talwit a k-t-siweḍ ar wanda llan awk yizmawen nneγ.
Sgunfu di telwit a yilleli.Sγur Amnay Asabter yellan deffir wa | Asabter n zdat
Ulac win i d-yennan kra γef umagrad-a. Ilik(kem) d-amdan amenzu ara d-yinin kra fell-as.
| |  |  |  | |
|