Tamurt-inu ur tgi tamurt (ADERFI Laarbi)

Tamurt-inu ur tgi tamurt
Ufan-ed taddagt ibuγlan
Ccen tanafut-ns
Feln-tt ar tteγar
Ttun will tt iẓẓan

Tamurt-inu ur tgi tamurt
Nγan inemγurn snat tikkal
Teg temmuzzeγa γar taγewwaγt
Ilemd warraw tikerkas f wakal
γ ugeḍrur inγuba wawal


Tamurt-inu ur tgi tamurt
Afgan ur ili atig
γar iγ ittu mas
Ulamma gis issumm
Yiwl tiwurga iqjern

Tamurt-inu ur tgi tamurt
Tga gis tmeṭṭut tamuzunt
Iγ tt ur fsern i imsaγen
Uwten-as aγenbur illasen
Skern-as urti ger kkuẓ iγerban

Tamurt-inu ur tgi tamurt
Yan itteren ili-nnes
Mḍin aγruc irkuku
γ tillas iqerfen n tin imuγan
Neγ inγuba, ig akettay anekkid
Ar tterfufun ayt dars

Tamurt-inu ur tgi tamurt
Anezzarfu ibukḍ
Twerreγ tiṭṭ-ns s uqariḍ
Iwerreγ umeẓluḍ ihrukkemn s unezgum
Xef wayda d wakal as ittukkasn

Tamurt-inu ur tgi tamurt
Isanayn-ns iẓiln ar ttaddumn
S idammen
Isserka-tn uẓḍam d tiggirt
Isellaw umarg, iffud ul igenna yaḍn



Tamurt-inu ur tgi tamurt
Iârrimn rẓan illas-asn imal
Kra ijla kra ar itelli kra iswa-t ill
Midden summern ar thasabn ussan
Iwessarn ggudin iṭṭel-asn ḍama

Tamurt-inu ur tgi tamurt
γas inekkidn d icerrign
Izmuln-nsen s idammen ar saddumn
Ura tn imḥu wawal ula iqariḍn
Tudert ityagasn tẓuẓḍ igenna yaḍn

Tamurt-inu ur tgi tamurt
Sengaran arraw d ma-s
Fkan-as aγu n tikiwt
Ssferγen-as ixf ula ils
Ijlu γ tgusaf ur yad issen ma iga

Tamurt-inu ur tgi tamurt
Nga am imuγan ur ittukrafn
Ur numẓ akal ur nella s wawal
Kra intarraḥ kra iksa γ unezgum d igulaz
Iγ ur nenker nsuzzer idammen
Ussar ra teg tmurt-inu tamurt

ADERFI