Tukkist seg wedlis n Dda Lmulud at Maamer "Inna-yas Ccix Muḥend" id yefγen deg 1990 .
Mi d-yekker netta, yufa-d lewlaya γer-es sin wudmawen: yiwen d win d-itekken si leqraya, wayeḍ-d win n yigad iwimi tettunefk sγur Ṛebbi mebla ma γran; ur izmir ḥed a-d-yini wi γef ara d-nzel wala melmi wal'amek. ṭṭariqat yellan di lweqt nni lkwetra deg-sent zdukulent tent i-snat : d amedya Ccix Aḥeddad si lğiha yeγra, si lğiha nniḍen ḥesbent medden d lwali, bab n l-lbaṛakka.Maca lmeqeddmin d wid iγran tfeṭṭilen leqraya γef tibbudelt.
Sin wudmawen agi, izmer bnadem ad yini belli mkul yiwen γur-es tiγariwin is, γur-es laayub is. Tiγariwin ladγa banent. Tineslemt tebna γef tira n yedlisen, amezwaru deg-sen d Leqwra - u tira ur ttbeddilent ara si tmurt ar tayeḍ, si zzman ar wayeḍ.Maca win iγat Ṛebbi s-lewlaya taḥerfit, tamezwarut d aqrib γur-es, tis-snat izmer ad isnerni di tmusni d ṛṛeḥma ger lεibad ugar iwimi yezmer win iγran kan d leqraya.Lqari ittfessir, lwali yesnulfuy.
Leεyub nnsent i-snat ula d nitni ur ffiren ara.Lεib l-leqraya d win iγran itbeε kan asekkil n wawal, iğğa ṛṛuḥ is. Iẓṛa acu d-yenna ccṛeε, dγa yeqqim din , ur ittnadi yara ad izzγez di lmeεna alamma yewweḍ s-aẓaṛ das ifkan tudert, ur iẓṛi yara belli tella lmeεna nnig lmeεna, yeqqujer s-iri n tira am s-iri l-kanun, yugad, ma yebεed seg-s s-tardast, a-t-iwet uzuḥḥim.
Seg-gidis nniḍen tidderwect ula d nettat s leεyub is. Wid ittedεen belli tettunefk asen lbarakka t-tunṭict sγur Ṛebbi, llant tekwal i-deg ttaran timmuhbelt d umexlel d lewlaya, netta kra din d ilem neγ d azemmjger.
lγaci , ma tebγid , smenyafen ineggura-ya. Ayen? Acku in iγran ul'i'sen-d yefk nnig wayen llan di tira. Wamma lwali, ttrağun seg-s ad asen yefru akw tilufa, u nwan belli, almend n l-lbarakka ines, izmer i temkerriwin.
Ihi abrid d-yewwi Ccix ixulef itent- i-snat.Amek? ixulef deg-gwakken mkul yiwen di sin wudmawen-a yekkes as leεyub ines, iğğa-d ala iman l-lewlaya d aḥerfi.I leqraya yekkes taγert, i tibbudelt yekkes timucuha d uxelxel. I-yat leqraya tuqmiṭ yeqqar: "izwar yiman asekkil". Neẓṛa ya belli t-ta ay d ssebba swayes ibḍa di tazwara netta d Ccix aḥeddad . Lmitaq s-ufaṛeẓ n tmellalt ammar ad yil ixulef lqanun n ṭṭariqa tareḥmanit, akken t-id iğğa Sidi Mḥemmed U-εabderreḥman di lkaγeḍ, maca lmeεna macci di tira yura di lkaγeḍ , lmeεna γer wul n bnadem d wayen ixeddem d lfayd'ara d-yawi i-yman-is wal'i-lγir si lmitaq d-iwwi γer ccix-is ama s-ufaṛez n tmellalt, ama s-ucbak ufus, ama s-wayen nniḍen .