 | | |  |
 |  |  | |
|
|
|
|  | Issin : asegzawal n Kamal Buεmara
|  | Iwweḍ-iyi-d usegzawal "Issin" n Kamal Buεmara si tmurt ddurt-agi yezrin u seg ass-en atan ssentaɣ allen-iw deg-s. Qqareɣ-t am ungal neɣ am tullizt. Ttnadiɣ deg-s awalen wa deffir wa. Ur as-ttserriḥeɣ la deg umiṭru la deg wexxam a s-tiniḍ wissen dacu i y-ijebbden ar ɣer-s am ddkkir acku d tikkelt tamenzut i ṭṭfeɣ ger ifassen-iw asegzawal n teqbaylit. Si zik kra i d-iteffɣen d imawalen llant-ed deg-sen tmeslayin nniḍen am tafransist, taglizit neɣ tikkwal diɣen taεrabt. Maca tikkelt-a, Kamal Buεmara icemmer iɣalen-is i usenfar-a u yessaweḍ yessufeɣ-d asegzawal s teqbaylit kan. yeṛza asalu u ad d-yeqqim yisem-is deg umezruy-nneɣ.
Ihi asegzawal-a deg-s 6000 tewwura. D tidett macci aṭas acku taqbaylit ɣur-es ugar n 6000 n tewwura. Ula s tmuɣli, deg wakken nennum isegzawalen n tmeslayin nniḍen hrawit u ttbinen-d ččuṛen d tiwwura d tmussni, wagi rqiq kan. Mi t-serseɣ gar "Le Petit Robert" d "Larousse" iban-d am akken yessetḥa neɣ yennuɣni. Maca am akken d-yenna Kamal, asegzawal-agi mazal ur t-ifukk ara. Sya ar zdat a d-yeffeɣ gma-s n wagi d-yeffɣen tura u ad ilint deg-s ugar n 20000 n tewwura. Maca sya ɣer din tella yiwet n taluft i riɣ ad tt-id-iniɣ acku ussan-agi awal ɣef umahil n Kamal Buεmara yezga ɣef yilsawen, yezga deg ismilen n teqbaylit...Xarttum wa yeqqar i wa! Diɣentta yessusi-d asirem deg ulawen n wid iḥemmlen taqbaylit u nekk gar-asen aql-i ḥareɣ ad d-yeffeɣ wayeḍ-agi i s-iɣ-d-iṛeggem Kamal.
Ihi anda yella usirem yezmer ad yili imeṭṭi acku ma yella nekref ifassen-nneɣ nettraju di Kamal kan yezmer a s-yaẓay usenfar. Ur ilaq ara a s-nesbib kan i netta taɛkemt. Tira, aseɣti d usufeɣ n usegzawal am wagi yeḥlajj akud, iɣalen d wallalen. Dɣa din i tent-nuɣ s Iqbayliyen: ur nettak ara i yiman-nneɣ allalen xas fessus fell-aneɣ. Ihi akken a nefk afus i Kamal, akken a s-nefk cwiṭ n wallalen, xas ahat s tmussni ur nezmir ara, nezmer a naɣ asegzawal-agi "Issin" i d-yeffɣen. Ilaq ad t-naɣ. Win izemren ad yaɣ sin yaɣ-iten, win izemren ad yaɣ mraw yaɣ-iten. S waya kan ihi i nezmer a nessebɣes di Kamal acku asebɣes s wawal yelha maca asebɣes s tedrimt yugar-it.
Ihi ay atmaten, ma nra ad yili ɣur-neɣ kra n yiwen wass usegzawal bu-20000 n tewwura neɣ ugar yessefk fell-aneɣ a newwet ar ljjib. Isenfaren akk i wumi kkren medden, ma ulac deg-sen aɣrum ad uɣalen a sen-sserḥen, a sen-brun. Tigi macci d timsal ukellex.
M.A.U
|
|
|
|
|
| Isalen & tidmiwin | 
Sγur
Lxuğğa n mmi-s n Wemsed | Ula d tiyessetmatin ur d asent-yexṣir ara ma uγent-tt.
Almi d ass-a i teslam yes-s dinna γur-wen usegzawal-agi εni? Uḥeqq jeddi-s Amsed ar d lεib fell-awen! :-)
Teha tsusant-agi, telha, tanemmirt! Mass Buεmara yuklal asebγes ama s yimi, s iḥulfan d tayri n tegmat neγ s tedrimt.
|
|
|
|
Sγur
winn n'da | aszgzawal aggi n'mas bouamara yewwid ad yilli di yal aγervaz u di yal taγiwant xerttum di tmurt n'yeqvailiyen.ula di tuddar,ayen ala?les comités de villages,ilaq asen tura ad sexdamen taqvailit,ama di tira neγ di tmena. |
|
|
|
Sγur
Azwaw | Tanemmirt tameqqrant i Kamal BOUAMARA ghef usegzawal-agi i d-issufegh.D-tikkelt tamezwarut i d-iffegh usegzawal am wagi yerna d-lexedma igerzen atâs, f-akken wallagh asevter-agi "fac similé". Afûd idjehden i Kamal deg isufar ines,ssaramegh kan adlis-agi a-t-aghen imeghriyen iqvayliyen.Yuklal ad inez ,u ad yili ghur yal aqvayli ihêmlen tutlayt-is |
|
|
|
Sγur
Ğ.B | Azul,
Tanemmirt i wesmel, afud anezmar i Kamal ilmend n leqdic-ines i ubaγur n tmeslayt-nneγ.
Wissen anda yettnuz wedlis-a?! Ur riγ a s-sbibbeγ taεekkemt-nniḍen uceyyeε-ines acku dagi γur-neγ deg Wehran ulac-it. Ma yettnuz di Bgayet, a γ-d-yini anta tamedlist ideg yettnuz akken ad nazen kra umazan.
Awer d as-kkiwen ifadden!
Ğ.B |
|
|
|
Sγur
M.A.U | Ahat ad yelli di Bgayet. Xerttum di Tizi illa imi syin iyi-t-id-uγ yiwet n temdakkult-iw (i wumi ar iniγ i tikkelt nniḍen: tanemmirt.)
Tura limer iγ-tt-tefki tegwnitt yelli ilaq ad yelli di Amazon akken anda ibγu iddar uqbayli ad izmir ad t-yaγ. |
|
|
|
Sγur
Azwaw | Adlis-agi n Kamal Bouamara,yettnuz di Vgayet ghur Tanedlist Summam i d-izgan deg Lexmis,zdat Usensu "La Plaine" akked Square Pasteur. |
|
|
|
Sγur
Berkus Tiwal | Tanemmirt ɣef umagrad-a. Asegzawal n Mass Buεmara yezga ɣer yidis-iw. Sseqdaceɣ-t yal ass, aladɣa mi ara weḥleɣ deg tira n kra n wawal ur ssineɣ .
Wid (tid) iran ad t-id-yaɣen deg Lezzayer, yella daɣen deg tnedlist-nni n unafag agraɣlan. Ixeddem 1600 DA.
Tanemmirt |
|
|
|
Sγur
LAOUFI AMAR | AZUL, TANEMMIRT GHEF UMAGRAD-A. ASEGZAWAL N MASS BOUAMARA DAYEN ID-YERNAN AFUD D WAZAL I TUTLAYT TAQBAYLIT S TEQBAYLIT. IHI TEWWI-D GHEF YAL AQBEYLI NEΓ TAQBAYLIT YETTASMEN ΓEF TEQBAYLIT-IS AD YEKSEB DEG UXXAM-IS. AZAL-IS DI TNEDLISIN N TMURT N LEQBAYEL: 1250 IDINAREN. |
|
|
|
Sγur
Ilelli | Tanemmirt a mass Kamal BUΣMARA γef usegzawal-a, nessaram-ak afud igerzen d teγzi n tudert i wakken ad tessiγezfeḍ ugar, acku tutlayt-nneγ tugar aya (6000 n wawalen)tuklal ad timγur ad teddu d tiyeḍ, ternuḍ ugar n waya tamaziγt tusser-ik. Maca mi t-γriγ, ufiγ kra n tmeslayin ulac-itent deg usegzawal-a, i wakken ad t-nessimγer ilaq ad as-duklen aṭas n yimdanen i wakken ad ilint aṭas n turdiwin. Tanemmirt i tikelt-nniḍen a Kamal d wid akk i iqedcen γef tmaziγt. Adlis-a yella deg Uqbu i wid it-yexsan. |
|
|
|
Sγur |tilelli| | | Azul fell-awen
Nekk d yiwen seg wid yuɣen asegzawal-a n mass Kamal Buɛmara,yerna gliɣ-d yes-s i temkerḍa n uɣerbaz ideg lliɣ, Mass Kamal d aselmad deg tesdawit n Bgayet mači d menwala d aymi ula d leqdic-is igarrez ɣas ma meẓẓi,
Dacu kan bɣiɣ ad d-iniɣ yiwet n tamawt, imi deg ufus-ik yezga akken d-tenniḍ usegzawal n mass Buɛmara, ihi yewwi-d xersum ad tlemdeḍ cwit n tira imi ugten yikettiren deg uḍris turiḍ, ttmenniɣ ur k-yettɣaḍ ara waya, mači s kra neɣ kra maca yettɣaḍ -iyi lḥal mi ara ẓreɣ wid iḥemmlen taqbaylit ur ssinen ara ad tt-arun, Yella udlis "ilugan n tira n tmaziɣt sɣur : K.Bouamara, B.Hamek, M.H.Mahrouche, Z.Meksem, A.Rabhi , M. Tidjet Edition TALANTIKIT Béjaia 2005 yettɛawan aṭas i win yebɣan tamaziɣt, yerna yerxes ????? |
|
|
Tekki da akken a d-tiniḍ kra neγ kra. |
|
| |  |  |  | |
|