Tagi d tabṛatt i-γ-d-yura Ğamel Benεuf. Tesfeṛḥaγ almi d tama-ihin akk-in, yernu d aḍris yuklalen leqddeṛ imi ameskar-ines d amyaru, d amedyaz, d win ifkan azal i wawal. Rriγ-tt-id deg tesga-ya n isalen imi llan deg-s isalen γef leqdic iḍerrun γef tutlayt-nneγ deg teγremt n Wehṛan akk-en d-ittili leqdic deg tγermin n umaḍal anda yella kra uqbayli.

Ad faṛseγ tagnitt a s-iniγ anṣuf ar usmel-a s kra n wayen a d-yasen s γur-k.

Wehran ass n 11 di Γuct 2006.
Sγur: Ğamel Benεuf
Azul ay atmaten.
Ssarameγ di tillay yelhan ideg tellam. Buddeɣ-awen afud d tezmert tuzmirt s waydeg ara temmagrem tameddit i γ-yeggunin. Tanemmirt ilmend n yiznan-nwen i γ-d-yernan tabγest s wayes ara nernu deg wussisen-nneγ i yidra n tneflit akk d ujuǧǧeg n tutlayt, idles akk d tγerma-nneγ tamaziγt i yenḥafen.
Ssurfet-iyi ma εeṭṭleγ kra γef tririt i yiznan-nwen, γas ḥṣut aya ur yelli d astehzi neγ d azal ur ur fkiγ ara i yiznan-nwen; maca, d akud kan i yi-tt-yekksen.
Ayen i yi-yerzan nekk, a wen-iniγ kan, aya: seg wakken ḥṣiγ ayen giγ nekk a d-yettban d awezwaz zdat wayen i tgam kunwi, imi asnulfu d ibeddi γer wesmel n imyura. Com mačči d ayen fessusen, neγ d asqecmeε. D kunwi i d imezwura deg umezruy n ddunit i yeldin ṭṭaq neγ asfaylu-yagi s waydeg ara nwali amaḍal amiran, yernu s tmuγli-nneγ nekkni, mačči s "nnwaḍer" i d-nerḍel sγur wiyaḍ ( s tmaziγt, mačči s tefransist, mačči s taɛrabt). Ayagi i wen-n-nniγ, yekka-d si tlemmast n wul-iw, mačči d acebbeḥ imeslayen. Si tama nniḍen: ferḥeɣ aṭas imi uγeγ, neγ imi ṭṭfeγ adeg ( amkan) ger yemyura n tmaziγt, s tmaziγt deg wesmel: imyura.Com; ḥulfaγ s waya amzun yerna-yi-d iseγ d lḥerma, akken i t-yenna akken Dda Lmulud: "Am win yeffuden yeswa, am win yeddreγlen iwala, am win ihelken yeḥla."
Tuklalem azul d tnemmirt imi ur tessemgirridem ara gar yemyura, ulac win tugim, ulac win terram deg yidis, ulac miḥyaf, ulac tinna akken: rfed wa, γḍel wayeḍ, ssekfel-d wa, γumm wayeḍ, tessemyugdam gar yemyura; yal wa s wazal-is, ayuz (bravo ) γef wannect-a.

Melmi ara-d-yeffeγ wammud n tullisin (tullizin)?
- Wagi, d asenfar kan, werεad yemmid, ddeqs umahil i d-yegran deg-s. Yal mi ara s-kkreɣ ini yennulfu-d wayen nniḍen, ini ssegriγ-t. Am wakken teḥṣiḍ, leqdic umezgun yeṭṭaf aṭas lweqt: Seg tira, ar tririt s asayes, ar tedlegt, ar uwelleh n imariren, ar tazzla γef ihanayen.
Rnu-yas daγen tullin ( lemεawna) i wiyaḍ: Wa yessefk a s-γreγ aḍris-ines, akken a s-fkeγ rray-iw. Wa yessefk a s-sseγtuγ aḍris-ines. Wa ixuṣṣ-it kra n wawalen i weḍris-ines. Daγen tgeγ( xeddmeγ) yiwet temsirt s tmaziγt i kra n yelmeẓyen, yal ass n lexmis.
Tura, Aql-i uγaleγ γer yiwen usenfar i bdiγ di 1989, asenfar-agi yerza: alqaḍ n kra n wayen i wumi nezmer a d-nessemneε si timawit; ama d timucuha, leεwayed, inzan, d wayen nniḍen.Asenfar-agi yerza tamnaṭ n At Σebbas ( kra n tuddar n Yiγil-Σli, ma nufa wid ara γ-d-yefken afus a t-nessihrew ugar, γer tuddar nniḍen). Ḥṣiγ dayen meqqren, wissen ma ad idireγ alamma yekfa, ma ulac ahat a t-kemmlen wiyaḍ. Di tamsalt-agi dγa, aql-i, deg wussan d-iteddun a wen-in-azneγ yiwet teγri tawezlant ideg ara d-ssutreγ tullin, ahat ulaεud ad ilin wid ara yi-d-iεiwnen.
Ayen yerzan izen i d-yekkan seg inedbalen n wesmel, attan tririt-inu:Tamezwarut ferḥeɣ aṭas imi tefkam azal i wayen ttaruγ, tanemmirt tameqqrant γef waya. Isefra imaynuten ulac, ḥebseγ tira isefra, acku llan tura wid yettarun isefra deg Wehran mačči am zik; ma d wid i d-yeddan deg wammud. "Tujjma tuzzma" i d-yeffγen γer teẓrigt "l'Harmatthan" ma twalam uklalen a d-rsen deg wesmel, γas get-asen amkan, ayagi d ayen ara yi-d-yernun iseγ. Tegra-d deg wayen nniḍen, haten wayen ara wen-in-iniγ: Tigwti deg wayen uriγ yella kan di lkaγeḍ, acku ur sεiγ ara aselkim ( amikru), ayen i wumi ssawḍeγ uriγ-t s uselkim n tiddukla Numidya, maca , uriγ-t s isekkilen "AMAZ", alammi d tura i bdiγ ttarraγ-ten-id γer isekkilen n "Gentium". Ihi, ma tram, neγ ma texsem, neγ ma tebγam a wen-in-azneγ snat tmezgunin ara d-yeffγen di taggara useggwas-agi γer teẓrigin H.C.A ( ma ṭṭfen deg wawal-nsen, wissen?); a tent-id-tseddum deg wesmel, d acu kan γezzifit cwiṭ. Ma twalam γezzifit, sserset-d kan iselγat (Prospectus)-nsent, aql-i ttrağuγ tiririt. Tella daγen yiwet temεayt( tamacahut, neγ tanfust) i d-yelqed Ḥamid Baḥfir s yisem "Felfla", ma tebγam a wen-tt-in-azneγ. Yella daγen yiwen weqcic, isem-is, neγ isema i yiman-is "Aṭlas", yebda yettaru di kra imagraden s yezwel : " Liẓ-avuntir n Dda Qiqi", yuzen-d amezwaru i Tafukt, maca, dayen qessiḥen cwiṭ, yettmeslay-d γef wayen yerzan iḥulfan ( tayri) d wayen akk yerzan ayen ḥemmlen yelmeẓyen, wissen ma a d-ffγen di Tafukt, acku kra deg-neγ ugaden seg waya. Ma tebγam a wen-in-azneγ amagrad amezwaru i yi-d-yuzen, a wen-t-in-azneγ, sserset-t-id deg wesmel, γas ma yeffeγ-d daγen deg weγmis Tafukt, ulac fell-as. Ssya d afella, yal tikkelt ar tayeḍ a wen-in-ttazneγ kra n weḍris. Ssya ar yimir-nni, a wen-buddeγ tazmert d wussan yelhan. Ssurfet-iyi ma stuqqteγ fell-awen awal, ḥṣiγ γezzif yizen-agi-inu, yeqqel d amrar. Ğğiγ-ken di talwit d liser, ar yizen nniḍen. Tanemmirt.
S iḥulfan n tegmat d wul zeddigen.

 Ğamal Benεuf.

Azul,

mass Ben3uf-agi yuklal ad yerfed wemdan ccan-is
d asawen.
&r´i& ungal-is " Timlilit n t&ermiwin", ufi& d tidet yakk imeslayen-nni yura fell-as Kamal Uzerrad deg tezwet n wedlis-agi.
Ssurfet-iyi ad rrnu& s awal n Kamal imeslayen-agi:

D ayen yugaren agerruj, d amextaf lemmer ad is´ub seg igenni, ad yejbed taqbaylit seg u3enqiq-is yeknan &er &ur´-s d aswen.

Tanemmirt i mass i Ben3uf, tanemmirt i kennwi d kennemti n imyura.
Essaid

azul felawen a kra yelan d amaziΓ d el qaεa neΓ d eg geni.
vΓiΓ ken ad iniΓ afud amqran i wid iqdcen Γef u geṚuj agi inesΣa . win yebΓen ad yaru s el ferh at magraΓ .
nek d yewen umaziΓ ig lan d marseille .