Ussan-agi, yenna-yak, tekker ger Butefliqa akk d Tufiq. Yal yiwen seg-sen yebγa ad yeẓẓeε wayeḍ a tt-id-yawi deg berra. Tufiq, yeqqar-as, d nekk i d Ṛebbi n Lezzayer, Butefliqa yeqqar-as d nekk. Asteqsi tura: anwa i d tidet d ṛebbi n Lezzayer? Yiwen yefruri-d seg terbaεt-nni umi qqaren akken s tṛumit « les éradicateurs », wayeḍ seg tinna n « les reconciliateurs ». Ihi yekker imerẓi ger snat n trebbuyaε-agi. Neγ ahat ger tarbaεt n Wejda akk d terbaεt…ur ẓriγ ara tayeḍ amek i s-qqaren. Tarbaεt n icawiyen akk d iqeffafen-nsen. Iqeffafen-nsen? Anwi i d iqeffafen-nsen? D iqeffafen n terbaεt n Wejfa i d iqeffafen n icawiyen. Leqbayel n sserbis. Ẓewren deg laddministrasyu a sidi widak-nni. Asxerbubec, ulac wid i sen-izemren, tatatatatatat..tac…wala a Sidi tfukk, yegra-d kan ustenyi…ax a sidi.

Yenna-yak, ass-agi dγa, iceyyε-as Butefliqa i Tufiq, ineγdamen, «les magistrats » ma tebγiḍ a d-tiniḍ. Yerra-ten-id dadda-k Tufiq γef wemnaṛ. Yenna-yasen : » errẓet akkin, tuγalem ar bexta-nni i ken-id-ceyyεen, iniwt-as, s … » Yenna-yak d aqbayli Tufiq, yennulfa-d d aqbayli. Yettgalla ar di 20 deg yebrir-agi, ar tt-yesluγ di tmurt. D Genzet, i d taddart-is. Amek a tt-yesluγ, a d-yesseḥṛec ahat Saεdi. Saεdi, netta, yenna-yasen “faqu!”. Nnan-as dacu a d-tiniḍ deg tedyanin-agi i d-skeflen γef ayen iḍerrun deg Sonatrach, yenna-yasen, tidyanin llant seg zik, amek almi d ass-agi i tent-id-skeflen? Acku tekker deg waygar-asen, bγan a γ-sekkin; Ihi nekkni ur ntekki ara.

Netta, yenna-yak, Tufiq-agi, d azrem. Yesεa yiwet n teẓri, i s-ifaqen ḥala Saεid Meqbel. Tiẓri-agi ines, teqqar: “a k-nγeγ deg nnefε-ik». Safik tura a k-ineγ, akken ad tuγaleḍ tettwassneḍ. Ad tuγaleγ d campyundimund. Ticki temmuteḍ a k-εellqen ticrurin. Ticki i k-εellqen ticrurin i kečč, ihi ula d tiktiwin inek, ula d tarbaεt-nni uγer tettekkiḍ akken a s-d-ṣaḥent cwiṭ seg tecrurin-nni i k-εellqen akken. Yenna-yak yezmer ad ineγ ula d yemma-s, ma yeẓra dakken a s-d-tawi kra n tbaγurt. Llan wid i k-yeqqaren d netta i yenγan Matub. Yebγa meḥsub ad yerr lmil deg wayen yurzen ar wacḥal imeγrasen i sεan Inselmen akk d wid i sεan «Imagdayen ».  Ihi tura, ur neẓri ara, ma ar γur-s yerra lmil neγ werεad. Tura ma werεad, ahat, ad yernu kra ussan-agi i d-iteddun.

Tarbaεt n Wejda, nutni, faqen-as. Ihi ẓran dakken ad yenγ ula d yemma-s. Ihi ttanfen-as ad yenγ yemma-s, maca ur s-ttεelliqen ara ticrurin. Ma tebγiḍ a d-tiniḍ ayen i iγil a t-id-yerbeḥ Tufiq, ulac. Ticki i tt-yenγa, a s-inin yeγza-yas: d tavwayutt, d tacemmamt...d yir nettat. Dγa Tufiq, yerwi-yas leḥsab. Ayen akk i d-yeγra deg u-KGB iṛuḥ di ṭṭlam alellas.

Widak-nni yemmut-asen Lεeṛbi Belxir. D win i d ddeb n Tufiq deg terbaεt n Wejda. Ur s-d-ufin ara remplaṣu. Butefliq akk d Zerhuni, am akken ur s-zmiren ara i Tufiq.

 

I lγaci amek i sen-teḍra deg ubaxix-agi? Llan wid i yeddan d terbaεt n Wejda, acku qerben ar Wejda. Llan wid i yeddan d Tufiq, acku umnen Tufiq a sen-d-yawi titrura (la modernité quoi). Llan wid i yeddan d at Wejda, acku bγan ad bnun aṭas n leğwameε. Llan wid yeddan d Tufiq, acku ḥemmlen adebbuz. Llan wid i yeddan d Butefliqa acku keṛhen leqbayel. Llan wid yeddan d Tufiq acku d azrem, nutni ḥemmlen izerman.. Wid i tt-yesdubben yid-sen, sin-agi, ur d-ḥaren di kra. Awi-d kan ad qqimen ad ččaren izembyal-nsen. Yenna-yak tuγal d lexla. D tiniri…almi d ass-a?