Aqbuc n ddabex neɣ nnif n twaɣit
Tirrumit mgal tirrugza
Sɣur Akli Kebaili
Ayen yeḍran di Berlin ass n 9.7.2006 ad yensex ahat deg iqurray n waṭas n yemdanen di ddunit. Ass aneggaru n Zizou di turart-ines n ddabex yeẓra takarṭiwt tazeggaɣt, yeǧǧa turart yeḍran gar tmurt n Fransa d tmurt n Ṭelyan akken d tazgent.
D imelyaren n yemdanen i yeẓran amek Zizou i yewwet Marco Materazzi s uqerruy ɣer yedmaren-is. Dayen ur yettamen wallaɣ, amek argaz am Zizou izem aɣilas teḍra yid-s twaɣit am ta ? Zizou yezdeɣ ulawen n waṭas n yemdanen di yal taqernit n ddunit
Akken nnan at zik-nni: Ala win yewten d win yettwawten i yeẓran dacu yeḍran. Qqaren daɣen "Ideddicen qqazen ḥellun, yar lehḍur qqazen rennun".
Annecta yenna-t-d Zizou ass n 12.07.2006.
Tiyiti n Zizou s uqerruy-is ẓran-tt akk medden, ma d rregmat n Materazzi yiwen ur sent- yesli. Attan twaɣit!
Iṭelyanen bɣan ad awin aqbuc n ddabex-nni ama s turart, s yiɣil neɣ s tirrumit.
Dɣa nnan ahat deg wallaɣen-nsen: "Yessefk a nnawi aqbuc ayen yebɣun yeḍrun yeḍra". Zizou ahat yenna d yiman-is deg teshiḥt-nni n rregamt:"tura dayen a s-fkeɣ tiɣrit, ayen yebɣun yeḍrun yeḍra". Yenna ahat: tirrugza tiyf aqbuc, tiyf akk ayen nniḍen.
Ẓriɣ aṭas n medden ama di tmurt-nneɣ, ama di tmura nniḍen nnan: Zizou yexdem ayen yelhan. Dacu i d azal n weqbuc n ddabex ma yella yeɣli nnif teɣli lḥurma.
Dacu kan yessefk a nẓer dacu i d agmuḍ (résultat) n taluft-a?: Zizou yeskakkeḍ acemma Aṭelyan-nni, yeǧǧa turart s wannaz uqerruy, maca yewwi yid-s tirrugza.
Aṭas nnan: Zizou iban-d tura d Azwaw (Aqbayli) n ddkir.
Ma d taluft n nnif n lḥurma ur tettwassen ara da di tmurt n Lalman neɣ n waṭas n tmura nniḍen. Ihi aṭas n medden ẓerrren kan lfalṭa n Zizou.
Aṭelyan-nni yergem Zizou, yessufeɣ-it seg turart, taggara yewwi aqbuc, yekcem ɣer tmurt-is s wul yennecraḥ.
Ihi yezmer ad yini yiwen, tirrumit teɣleb tirrugza, teɣleb nnif n twaɣit!!
Dacu kan ula d Zizou d amdan kan i yella mači dayen nniḍen.
Zizou ad yeqqim deg ulawen-nneɣ. S wudem-is d sser-is nban-d acemma gar tmura.
Tanemmirt a Zizou ɣef ayen i tenniḍ ass n 12.07.2006 i warrac. Tenniḍ ayen i txedmeḍ ur yelhi. S wakka yiwen ur yezmir ad yettu ayen yelhan d-k! Tura ẓran warrac ul-ik zeddig.
Nesaram-ak teɣzi n tmeddurt s talwit d unecraḥ n wul.
Wissen ahat kra n wass ad kkren aṭas n Zizuwat nniḍen ad uraren ddabex i tmurt-nsen tazwawt tilellit.
Ɣef wudem-ik a Zizou i nefka afus i Fransa! S yess-k nezdi lqedd, nenna ula d nekni nella. Nḥus iman-nneɣ am akken nesɛa amḍiq-nneɣ gar tmura.
Ifransiwen, Izwawen afus deg ufus.
Frankfurt am Main, 13.07.2006
IMYURA.COM : Wid ibɣan ad stenyin tabṛatt n iqbaylien i umyurar Zidane ad tekkin da.