 | | Imagraden |  |
 |  |  | |
|
|
|
Ferhat deg Moyeuvre-Grande Ass n 10 deg mayu 2008, Ferḥat yettwaεerḍ-d sγur tiddukla « Amitié euro-berbère», CFBBL akk d « CBF Lorraine ». Ferḥat yewwi-d awal tazwara γef uẓar n tefsut n 80 akk d wamek i yessefk ad ikemmel tikli-s ass-agi umussu akken ad yaweḍ ar yiswi-s. Imi timlilit tella-d deg Fransa, ameslay-is yella-d s tutlayt tafransist. Yenna d akken ass-agi ur icaḍ ara kan a d-tiniḍ “nekk d amaziγ», imi ma tenniḍ-d kan akka, tsusmeḍ γef tirni uγur tettikkiḍ, tsusmeḍ γef tnettit-ik taqbaylit, am akken tesseḍḥaḍ yes-s. Ihi amussu yessefk ad ikemmel deg webrid yessawaḍen, abrid ar timanit n tmurt n iqbayliyen. Yuγal-d ar deqqal, yecna-d tizlatin-is tiqbuṛin, tid i ikecmen deg umezruy n yeqbayliyen akk d win n imaziγen s umata. Yessegzay-d yal tikkelt, uqbel ad yebdu, asentel n tezlit s tefransist, i lmend n lemqaddṛa n wid yellan deg tzeqqa ur igezzun ara taqbaylit, gar-asen imḍebbren n tγiwant n Moyeuvre. Dγa aṭas i s-wten afus, imi feṛḥen yes-s. Tizlatin i d-yewwi Ferḥat d “tamaziγt», « yemma », « ayen riγ», « beṛwagiya”, “Che Guevara”, “Amẓarti”, “Ciao Bella”, “Berzidan”… Tazeqqa teččuṛ. Aṭas i d-yusan seg temnaṭ-agi n usamar n Fransa, seg Lalman, seg Biljik, seg Likksemburg. Wid i d-yusan uγalen ulawen-nsen ččuṛen d taqbaylit, ččuṛen d timanit. Aselway n “CBF Lorraine”, Hasan Lekadir, yenna: “ma γas CBF ur teddi ara deg webrid-a n timanit maca tettqaddaṛ wid yeddan deg-s. Ttbut, tεeṛḍ-d aselway n umussu-ya. » Tura, ma yessefk a d-yini akka neγ ur t-terri ara tmara, wissen? Llan wid yennan: ur yessefk ara a d-yini akka imi di CBF zemren ad ilin imaγnasen n timanit. Llan wid yennan: γas imi i d-yenna akka imi CBF d tidet mači d amussu i teddun γef timanit, d amussu i yefkan i iman-is iswi n wesdukkel n imaziγen yettidiren deg Fransa akken tebγu tili tmeẓriwt-nsen tesertant. winna (Ar tkamiṛatt d winna. Ssurfet-as imi yettergigi cwiṭ ufus-is) Asabter yellan deffir wa | Asabter n zdat
muhabdiki
- Tinin-is...azul fell-awen
tanemmirt i kečč i γ-id-yeseknen timlilit d-gant snat tdukliwin n temnaṭ agi deg tettilliḍ d tidet timlilit am ta d ayen yelhan, tefka-d tagnit i Ferḥat ad d-yeccnu tizlatin-is, d tektiwin ara d-yessegzin iswiyen umussu n timanit, maca aselway agi n C.B.F, Hasen Lekadir s wawal i d-yessegra yessengugi-d tidmiwin n wid i s-yeslan acku tagi d tiktiwin n C.B.F, nettat iswiyen-ines d anekcum ar ikubar d agi di Fransa i wakken ad ṭṭfen imukan di tsertit, ur d-ccliεen ara deg wayen iḍerun di tmurt, γef wannect-a ssfeclen aṭas n tidukliwin tidelsanin; ayagi d ayen ẓriγ acku lliγ deg yiwet n tidukla tadelsant;
- Tinin-is...Azul fell-ak a muhabdiki, tenniḍ-d dakken kečč telliḍ di tddukla tadelsant, ma tzemreḍ ad aγ-tiniḍ d acu n leqdic i d-ttilin γur-wen ?
- Tinin-is...tura attan teḥbes sebba-ines d ayen i d-nniγ akka, ikussawen;
- Tinin-is...B.Ǧ
- Tinin-is...Azul,
Tanemmirt yemmden a gma-tneɣ Winna. Agzul-a i ɣ-d-tewwiḍ d ayen i ɣ-yeǧǧan ad nwali ayen ur ẓrint wallen-nneɣ, ad nsel ayen ur slin imeẓẓuɣen-nneɣ; ɣas nba ( nɣab) amzun neḥḍer dinna. Yernu d tidet wayen d-tenniḍ, Ferḥat yettak-d tissas, yettarra-d tazmert i ifeddan acku d azumul umennuɣ.
Nekk, ur ssawḍeɣ ad waliɣ da tugna, acku tettergigi, tettruḥu tettuɣal-d, ula d ṣṣut daɣen akken; wissen ma dagi kan ɣur-neɣ neɣ akka i tella yakan deg wesmel?
Tamawt: Acimi “ul-awen nsen” mačči « ulawen-nsen »?!
Tanemmirt
B.Ǧ seg Wehran
- Tinin-is...Azul a B.Ǧ seg Wehran, nekk ttwaliγ-tt war ugur, maca nekk aql-i di Fransa, ahat d connexion n internet n tmurt ur neğhid ara?
Ssurfet-iyi ur ssineγ ara amek i s-qqaren i connexion s teqbaylit !
- Tinin-is...ayirat
- Tinin-is...ayirat
- Tinin-is...Ssneγ-t wawal-a " tuqqna ", mi ara yeqqen wemdan aγersiw, mi ara yeqqen wemdan allen-is, daγen tuqqna lḥenni.
- Tinin-is...Ttuγ daγen yiwen wurar qqaren-as " tuqqna tuffra ".
- Tinin-is...Azul ay ayirat
Tzemreḍ a yi-d-temleḍ amek tturaren 'tuqqna tuffra' agi ttxil-k? Neγ ahat d tturart nni iwumi qqaren "cache-cache" s tefransist? ma d ttin εni mači "Mufur" i teqqarem deg At Yiraten? Tanemmirt.
- Tinin-is...Azul a Wejṭuṭi, ih d tidet " tuqqna tuffra " d ayen i wumi qqaren "cache-cache" s tefransist, ma d " Mufur " ur t-ssineγ ara wawal-a, akka i s-teqqarem di tmurt-ik ?
- Tinin-is...Tuqqna ay ayirat d acuddu s teqbaεrabt neγ d asemlili s teqbaylit.
Tinna n " Tuqqna, tuffra", tella.
Anamek-is: Qqen allen-ik ( cudd-iten neγ ssemlil lecfar-ik ), ar
d-ffreγ. Ihi yiwen ad yeqqen allen-is, wayeḍ ad yeffer.
Aγyul iteqqen-it wemdan deg udaynin daγen.
Acekkel daγen d tuqqna...atg.
- Tinin-is...Azul fell-awen
Tanemmirt akk γef tedmiwin-nwen. Tanemmirt a Ğamal γef usseγti. Ad ččeγ aqerru-iw, d tuccḍa annect-iw!!!!
"Ulawen-nsen"
Nekkni deg tama n Weqbu neqqar "tuqemca tuffra".
Ar tufat
- Tinin-is...Tuqemca-agi daγen yelha a Winna.
Qemmec allen-ik, mdel allen-ik
Anamek yiwen, imeslayen ugaren.
D tamerkantit teqbaylit.
- Tinin-is...Azul akk
Ihi γur-neγ deg Imceddalen urar-agi neqqar-as "mufur". I turart "taqlajett" yella wi' tt-yesnen?
- Tinin-is...Dγa imi d-temmeslayeḍ a Wejṭuṭi af tqajett, kra n wagguren akka ar deffir, yiwen wemddakel deg wesmel nniḍen yemmeslay-d af turart-a, yenna-d dakken tturaren-tt s takurt d uεekk°az.
- Tinin-is...Azul
Turart-agi a Wejṭuṭi i wumi teqqarem "taqlajett", nekkni neqqar-as: taγlalt
Dγa yenna-yi-d yiwen a d-yaru amagrad fell-as imi netta yurar-itt zik-nni.
D turart telha nezzeh, maca bateγ amek tura yiwen ur tt-yetturar!
- Tinin-is...Azul a Winna, i wumi-tt tbidyutt-agi yellan nnig tin n Ferḥat ?
- Tinin-is...Azul ay Ayirat
Ur tezmireḍ ara a tt-twaliḍ? Terwi ihi.
Yessefk a s-εiwdeγ amek a tt-id-serseγ ihi. D tugniwin n Wakli Kebaili i d-yuzen Essaid, rriγ-tent-id akka d iniẓri neγ d tabidiyutt.
Tanemmirt γef tamawt
- Tinin-is...Ad tafem ayen i d-yenna Ferḥat deg Moyeuvre deg usabtar n imyura.net deg wesmel n youtube:
www.youtube.com/imyura
- Tinin-is...Azul a Winna, tabidyutt-agi ttwaliγ, maca seg wakken wezzilet γileγ tettwaγ, nniγ-as ahat ur d-terrim ara akk ayen yellan deg-s? Neγ dayen kan i yellan deg-s ?
- Tinin-is...Ttmeslayeγ-d γef tin n Wakli Kebaili mačči γef tin n Ferḥat.
- Tinin-is...Azul ay Ayirat,
Dayen i yellan deg-s. Ad ẓreγ amek a tent-id-rreγ tugniwin-nni akken nniḍen.
Ar tufat
- Tinin-is...Akken i yi-d-yessefhem gma-s n baba yennay-id taqlajett d tturart taqburt ahat teḥbes yakan deg iseggasen n 70(?) u γef akken fehmeγ tettak anzi γer 'Hockey' nni n temrikt ugafa.
Netturar daγen yiwen wurar deg taddart neqqar-as "lapiluṭ" (la pelote), wis ma tessnem-t? ahat γur-s isem nniḍen di kra n temnaṭ? Tettak anzi aṭas γer "cricket" n yegliziyen neγ "base-ball" n imarikanen, u nek cukteγ snulfan-tt-id wid yeεyan deg teqlajett acku s takurt akk d iεewzan daγen i tt-netturar! Ur cukteγ ara γer irumyen i tt-nelmed acku ur tt-sεin ara nutni u daγen mači am "la pelote" nni ibaskiyen. Wiss wi yessnen turart agi?
- Tinin-is...Taploṭ ssneγ d tin'akken n tpuciṭ uyefki ggaren deg-s lkwaγeḍ.
- Tinin-is...Azul ay ayirat
Tacekkart uyefki netturar yes-s ddabex uḍar ticki ulac ddabex (nečuddu-tt akken yessefk akken a teqqel d ttubrint), neγ ahat tetturarem yes-s ayen nniḍen? Turart i γef d-ttmeslayeγ (neqqar-as lapiluṭ neγ tapiluṭ ur cfiγ ara) urareγ-tt mači d abrid mači sin di taddart deg iseggasen n 80..maca ur ẓriγ ara ma d tturart yettwassnen γer wiyaḍ neγ deg temnaṭ nneγ kan i d-tennulfa? (ad nadiγ γef waya). Netturar-itt s uεekkaz akk d ttakurt tamecṭuḥt n leḥcic ntenneḍ-as ijerḍiḍen uceṭṭiḍ. Yessefk ad ilint snat n trebbuyaε, yal yiwet deg-s sin, kraḍ neγ ukkuẓ imyuraren. Sin imyuraren seg yal tarbaεt ad mqabalen, yiwen ad yeṭṭef aεekkaz wayeḍ takurt, ad mbaεaden s wazal n sḍis isurifen, deffir n yal yiwen deg-sen ad izg yiwen wemyurar seg yal tarbaεt, a ten-beεden s wazal n kraḍ isurifen. Bu takurt ad yeεreḍ amek a tt-iḍegger i win yellan deffir n win yeṭṭfen aεekkaz, bu aεekkaz ad yeεreḍ amek a yewwet takurt akken a tt-yerr s annar n yexṣimen. Ma yezgel bu aεekkaz takurt yeṭṭef-itt umeddakel-is, amyurar yellan deffir n win i iḍeggren takurt ad yerwel acku win yeṭṭfen takurt a-tt-yeddu deffir-s u ad yewwet amek a t-iḥaz s takurt nni! Ma iḥuz-it tarbaεt nni γur-s yiwen γer wulac ma izgel-it d wid nni nniḍen a yawin yiwen γer wulac; daγen ma yella bu aεekkaz nni iḥuz takurt d amyurar yellan deffir n win i iḍeggren takurt a yazzlen a tt-id-yawi u ameddakel n bu aεekkaz ad yerwel acku ad yewwet bu takurt akken a t-iḥaz...ahat εerqen-iyi cwiṭ ilugan maca cfiγ akka i tt-netturar s umata. M'akka tt-id-sfehmeγ wis ahat llan wid yessnen turart-agi? | |  |  |  | |
|