Mad nssen f tmazirt n Iran ? Amr "fatwa" n igllin n Xumayni lli d iḍi f Salman Rushdi, izdduten n Ahmadinijad lli ittini, takklit s tayyaḍ, i imzditen nes d ukrraḍ n usrummu iggutn lli s nn iga tuggas nes ad iṭṭf, ur nniγ is illa kra yaḍn.
Mayann akw a f ixṣṣa yan ad iγr adllis amaynu s tnglizt- Iran Awakening (Uduy n Iran)- n tmγnast bahra ittubdarn γ umaḍal n izrfan n ufgan γ Iran d timiwit n tsmγurt Nobel n Ufra, ad s tt igan d Shirin Ebadi. Iγ ira ad iẓr, s ixf nes, yat tugga idran f Iran, tmazirt ad meqqurn s medden nes d umzruy nes bahra iγzzifn.
Tamṭṭut ad, lli tt inn ikkan tga tmazzarfut isugrn lliγ sul yumẓ Shah tamazirt, sggwizen tt id Islamiyen lli skernin tagrawla γ usggwas n 1979, skeren gis yat tmsuwwrit akw mẓẓiyn γ yan usirra ur gin yat. Ur d is tsker kra, γar lliγ tga tawtmt !
Tamẓ tigmmi, tbudr snat isti-s yan mennaw isggwasen fadd ad daγ turri teg tmanεart. Acku ul nes ur tt yujja. Zeγ akud ann ad tusi tamsggart n timiγt f kra nna mu itca uzerf nes. Timγarin, tazzanin, imswingimen d imesnawen lli bahra ur tḥml tnbaḍt- mennaw ad akw gisen tfḍḍa. Ixf nw awl, wanna nn isduqqurn aggur nes ar as nn tlggem, tbed dis s aynna mu tufa. Ur jju d nettat ad d irurn kra n yan ka. Meqqar a tent gis tgallan ayt tnbaḍt lli ur innin a amar n isnuccugen d iskkiren nes.
Shirin Ebadi tbder γw arra nes mennawt tγawsiwin : tamẓayt nes γ Teheran, tiγri nes, tawwuri nes, izdayen nes d tagrawla n Xumayni… Macc ur jju d nettat ad ittun tiγawsiwin xaternin lli akw tṛanin γ Iran zeγ lliγ isllm ustsan amzwaru lli bahra ittuḥmaln, Muḥmmad Mussadegh, γ tanbaḍt asggwas n 1953, tarula n igllin n Shah, tagrawla n Xumayni γ 1979, imaγen sddemnin nger Iran d Σirak…
Macc taγawsa lli issuhumn γ udllis nes igat yat tgrawla ifissn lli mu d nzelen Islamiyen. Tagrawla ad tgat tin trbatin lli kcemnin tinml s mad iggutn ar lliγ akw tuggt n inlmaden γ tsdawiyin gan tent γar nettent. Irwas izd mayann a rad d yawi izenẓaren n unaruz lli rad idl tmazirt n Iran ura sul imzdaγen nes. Γ tsga neγ, uggar n γikann ad asen akw nsitm, acku stahllant ! Lahsen Oulhadj |