Adabu azzayri amesγullu igdel Timlilit niqal ad d-yeḍrun ass umhad 21 deg Cṭember   i lmend n usqerdec n iγeblan n tmurt iqbayliyen. Taγiwant n Weqbu iqeblen tazwara ad teḍru temlilit-a deg uxxam n warrac ibezṭaḥ tuγal ar deffir yiwen wass send(uqbel) ass n temlilit. Igensasen n FFS yeṭṭfen taγiwant-a nnan-d dakken «Lwali » n Bgayet iḥeṛs-iten-d i wakken ur ttağğan ara a d-yeḍru umlili-ya. Akabar n FFS issuturen tukksa n »waddad n lḥeṛs » seg useggas n 1992 ikker ass-a issers s yima-is lḥeṛs γef imdanen istenyan «Tiγri n Tifrit».

Ma xas akken awal iffeγ dakken timlilit ur tettili ara, aṭas i d-yusan ar Weqbu, azal n twinest(100) n imdanen ittwassnen deg unnar n tsertit igan tikli dinna deg teγremt n Weqbu armi d axxam n tγiwant ufan tbelleε ass-nni kan dγa. Wissen acuγer ?!!

Asqamu d-isuddsen(i d-yuṛganizin) timlilit-a yeγra-d alγu i wid d-imyagaren dinna zdat n tγiwant. Sinna yal yiwen innejmaε s axxam wer acewwel wer taṛuzi. Wid d-isuddsen timlilit qqimen agraw dinna yakan deg Weqbu i wakken ad mwatan γef usuddes n temlilit ass n 23 akk 24 n wayyur n Unbiṛ i d-iteddun akken bγun ilin wuguren.

Amussu i Timanit n Tmurt n iQbayliyen, illan d yiwet n tdukkla gar tiyaḍ illan deffir n temlilit-a, iwwet-d s tezmart deg ugdal-a, deg uqḍaε-a, n temlilit-a sγur adabu aseṭṭaf. Amussu i Timanit inna: annect-a d aγullu n imdanen γef izerfan-nsen n tlelli. Inna-d daγen ma uguren-a rnan-d ur ttwakksen ara, ad d-isuffeγ aberreḥ i medden ad d-ffγen ar izenqan deg tmurt n iqbayliyen akken ma tella.

Ayen akka d-yeḍran iskan-d i tikkelt nniḍen dakken tifrat i iγeblan akk d uguren nettemlil ad ten-naf deg  timanit n temnaṭ n tmurt n iqbayliyen i wakken igensasen n ugdud aqbayli ur ttilin ara d tiεelğtin gar ifassen n udabu.

Deg wakud imi adabu amsaεṛab iger irebbi, akken ad yaweḍ ar iswi-s aserti, i ineslemiẓriyen at ičumar isebben timenγiwt n 200 000 (snat twinas igima) n imdanen seg useggas n 1992, isseγli-d udabu-ya aldun n weḥras aẓayan γef iqbayliyen, tadamsa nettat tetteddu anagar s tjuεal, idles tekksen-as azal yal ass, asuffeγ seg iberdan deg tukksa n temḥaddit i  imdanen d wayla-nsen irra tili, aya akk rnan-as-d asekcem n ineslemiẓriyen d usebγes-nsen ar tmurt n iqbayliyen i wakken ad tt-ṛzen. Tamurt n iqbayliyen tezga-yasen-d d tiẓẓit deg taγect-nsen skud teqqim d agni n tlelli, n twizi, n tugdut akk d uḥaddi n yidles amaziγ.

Agdal, aqḍaε, n temlilit d-igren iswi n usqerdec n iberdan i lmend n uḥuddu n yimal(avenir) n ugdud azwaw ur d-aγ-iḥebbes ara γef tinin n tedmi-nneγ, ttexmam-nneγ, γef umaynut ad d-yilin deg tmendawt(constitution) ; ur d-aγ-iḥebbes ara diγen γef tiγri i ugdud azwaw akken ur iteddu ara ar tefranin ma yella tamendawt-a tamaynut ur tefka ara azref i iqbayliyen ad seddun tiγawsiwin-nsen s yiman-sen deg timanit i temnaṭ-nsen.