Wissen ul-is amek yeṛγa, tmurt n Yeqbayliyen? 

Akken ma nella nekker-d seg ddaw uzaglu unabaḍ n tmurt n Ledzayer. Ayen yeḍran tikkelt- agi d Mass Ferḥat Mehenni, d ayen yessen seg wass-mi yella d llufan, maca γas anecta mačči d amaynut, yella deg-s daγen kra n umaynut. 

Tikkelt-agi amzun kksen i yemma-s mmi-s seg tlemmast n irebbi-s, kksen-as mmi-s γγlayen fell-as aṭas. 

D tidet tayemmatt-agi γuṛ-s tarwa nniḍen, maca γas akken aṭas i temmermad, γas akken ulac ansi d wanida ur tečči tiγṛit, allen-is d tid-ak yettgerrizen tamuγli, ur tezzin ara fell-asent izaylalen. 

Allen-is walant ayen yellan d webrid yessufuγen, walan-t d mmi-s γγlayen fell-as aṭas i deg yella usirem-is, akken ad tekker γef yiman-is, ad tteddu γef iḍarren-is, ad tsel i mmi-s icennu fell-as s uburrez “ m´ur telli d tilemẓit, m´ur tecbi tawizett, m´ur tṛeqq am tergit...atg”. 

Tamurt n Yeqbayliyen tikkelt-agi tḥulfa s yiman-is amzun yemmut-as Muḥya tikkelt tis snat, wissen amek yeṛγa wul-is? 

Nekk yellan deg inig yewweḍ-iy-id ujajiḥ n iqjemyaṛ-nni n maras, wid-ak i s-d-yesker wemcum deg-s times. 

D iqjemyaṛ ih, wid-ak-nni icennun ḥala γef lxusuf d lkusuf, nerna nessalay deg ccan-nsen s igenni. 

Lemmer tella deg-sen tiqit n tmussni, dacu n umeslay d-yeggran d lawliyyat n Bgayet yugin ad yecnu Ferḥat s ddaw yemma Guraya? 

Muḥya tanemmirt, teğğid-aγ-d ayen s-nettmagar ussan d wurfan-nsen: “ A nnger-im a taγeddiwt!”.