Gilles Duceppe, amalway n ukabar azarugiẓri Bloc Québécois yusa-d ar tmeɣra n Yennayer id-tessali tdukla tadelsant Tafsut deg uxxam n tsuta n tezniqt « Lajeunesse » di Muntryal.
Mi id-ewweḍ, mgagin akw fell-as am uselway n tmurt. Iwlafen, tikamiratin, azulen, ansufen,…lḥasun macci d yiwet!
Netta, tezga tecmumeḥt isartiyen ɣef udem-is u itti lfuḍa ɣef umgarḍ-is.
Macci d tikkelt id-yusa Gilles Duceppe ar Leqbayel. Seg wass-mi I imlal d Ferḥat Mhenni, d tikkelt tis snat id-irza ar tmeɣriwin nneɣ.
Tikkelt-a taneggarut, ass n seb deg iḍ, yusa-d akken ad d-issarbeḥ assegwass ameggaz I Izwawen n Montryal u akken daɣen, imi ussan-a ar teddunt tafranin tifidiraliyin, ad d-immeslay ɣef tektiwin ukabar-is idmen abrid n uzarug I tmurt n Kibik (Québec). Ladɣa tedda-d yid-s daɣen u temmeslay-ed ɣef anect-a Viviane Barbeau, taɛeggalt n Bloc Québécois di tafranin-a di temnaḍt I deg d-izga uxxam n tsuta I deg d-tella tmeɣra yagi n Yennayer.
Gilles Duceppe, ur isḍuqet ara awal akken d-inna di tazwara n ini ines: “ur sḍuquteɣ ara fell-awen awal, imi ass-a d ass n tmeɣra!”. Maca iwwi-d awal ɣef Leqbayel n Muntryal d wugurren ttemlilin nutni d iminigen nniḍen am miḥyaf deg uxeddim iweqmen u inna-d “issefk ad nxedmet akken, afus deg ufus, akken a nekkes anect-a gar a neɣ, akken tarwa nwen ad yili ɣur sen imal am tarwa akw Ikibikiyen”.
Ibda-d ini-s s “Azul” u ikfa-t s “Azul” nniḍen, ayen I wumi ewwten afus akw medden u igar-d daɣen awal ɣef Ferḥat d “ttwaɣit icegben tisiswa” mi isla s wayen iḍran d mmi-s. Am isartiyen akw, ur ittu ara di tazwara n ini-s awal aziḍan: “ass-a nusa-d ɣur-wen, ar tmeɣra nwen, ar tmeɣra nneɣ d tirni imi nekwni d kunwi u kunwi d nekwni.”
Viviane Barbeau daɣen tessenta-d kra n wawalen ar I idegren Leqbayel izedɣen anda id-bed d tqɛeggalt ad tt-farnen di tafranin. S wawal awezlan, aziḍan id-sawel ar tafranin acku “ ala tasartit I izemren aɣ d-ssukkes deg uguren nettidir myal ass”.
Ma d tameɣra teḍra-d ama kken d-ḍeru zik: mlalen medden, wa iseqsa ɣef wa u cerhen wulawen. Lḥasen Ziani, di teɣmert, izenz adlis-s aneggaru n tmedyazt: Tijeǧǧigin n wawal.
Ar ɣur-s diɣen, tadukli tadelsant Axxam Umaziɣ di Montryal tessal-id tameɣra nniḍen di Collège Jean-de-Brébeuf . Ar dinna d tiwaculin I yusan aṭas u tigi ttasent-ed am deg isensiyen nneɣ n tmurt: myal yiwet tewwi-d yid-s seksu. Dɣa ccan mmedden, ceḍḥen, ḍsan. Wa isudun deg wa u wa iqqar I wa: yennayer ameggaz! Dinna daɣen Belqasem Iḥiǧaten iṭṭef tabla s idlisen-is.
Ssarameɣ ad ttilint akka tmeɣriwin myal assegwass u mennaɣ daɣen ad ngerrez acemma tudsa nsent imi akka llant tura, xas d allalen I tt-iksen, ur ssawḍent ara ar tmeɣriwin id-ittilin ar igduden akw idren di Muntryal.
M.A.U