Ay afṛux ifirelles
A k-cegâeγ awi-d ttbut
Σelli di tignaw γewwes
Awi-yi-d lexbaṛ n Tmurt

Abrid-ik yedheṛ iban
Deg-genni iqeṛb umecwaṛ
Ɣer Sidi Abd Rrehman
A lwali yqublen lebheṛ
In-as i bab n lbeṛhan
Aql-aγ di lγeṛba nenṭeṛ
Sellem γef leḥbab akken llan
Am-ass-a ncallah a-nemzeṛ

Σelli di tignaw ṛeḥḥel
Sinna truḍeḍ qbala
Ar Tmurt n leqbayel
Zuri-tt-id akk s lǧemla
Idurar akkw d sswaḥel
Leɛzayeb tuddar lexla
Sellem γef wid-enni nḥemmel
Yal yiwen anda yella


Zwir si Draɛ Lmizan
Ḥewess kra yellan d lḥuma-s
Ad-tɛeddiḍ γef izemran
Tiniri d tγezza wmecṛas
Ad-tefleḍ s Agwni G-geγṛan
Lḥara-nneγ rzu fell-as
Sellem γef leḥbab akken llan
Ɣas ad-tenseḍ din yi' bb’ ass

Kemmel s adrar n Ǧṛeǧṛa
Naqal ɛelli d asawen
Sinna truḥeḍ qbala meṛṛa
At Wasif d Icerriḍen
At micli d Tizi N Criɛa
Akken i d-mqabalen
Sellem γef leḥbab meṛṛa
D ssadatt Igawawen

Ḍil akk-inna γer Mayu
At Yeɛla d Bni Menṣur
Tazmalt At Abbas Aqbu
Sidi Σic Wad Amizur
Ḥader win i t-ttaǧaḍ cfu
Zuri-ten akkw yelha ttfakur
Syen γer Bgayet jbu
Guraya yɛussen lebḥuṛ

Sinna ḍil-ed s Ibeḥriyen
Rrif rrif n lebḥeṛ
Dehm-ed Tamguṭ Σlayen
Σzazga d Bni Yeǧeṛ
Meqlaɛ d At Yiraten
Ɣer At Yeni iqerb umcwaṛ
Sellem akkw γef yeḥbiben
Tzureḍ Ccix Muḥ Ulmexttaṛ

Syen zegr-ed s Iwaḍiyen
Ɣur-ek a-k-ɛeṛqen iberdan
At Σisi akkw d Iḥesnawen
Akkw d Wakal Aberkan
Tizi Wezzu d Balwa ɛlayen
Wagnun akkw d lǧiran
Sinna dehm-ed s Iflisen
Awi-yi-d lexbaṛ yellan.


Sliman Azem