Timlilit d Cami-Abranis
Tarbaεt n Les Abranis, wid umi neqqar nekni Ibranisen d-ilulen deg iseggasen n 70, d icennayen seg wid d-yewwin i ccna n teqbaylit tatrara amedya n Yidir, Ğamel εellam...
Cami Abranis neγ s yisem-is aḥeqqani Abdelqader Cmini d yiwen yettekkan di tlalit n terbaεt. Ilul ass n 26 tuber 1944 deg At Wertiran di temnaṭ n Leqbayel. Yunag γer tmurt n Fransa netta di leεmer-is 14 iseggasen. Ar ass-a d iminig, yedder gar Fransa d tmurt-is Lezzayer. Cami-Abranis mačči kan d anaẓur maca d amaru daγen. Yura aṭas n wungalen, yessekles timucuha n zik γef iḍebsiyen Cd Rom. γur-s mačči d yiwen usenfar deg wennar n tsekla. Nemlal-it di tfaska n Racontes-Arts. S lferḥ d ameqqran i d-yerra γef yesteqsiyen-agi.
Imyura : mass Cami-Abranis, si ccna γer tira, amek i d-yeḍra waya, acuγer ?
Cami-Abranis : akken s qqaren at zik : sani tettedduḍ ay aḍar, s aẓar. Ḥulfaγ am zun akken ccna d usefru drus, ur yeqqid ara wul-iw. Akken a d-iniγ aṭas n tγawsiwin d ineḍrayen i iceγben allaγ-iw, ḥala adlis i izemren i waya. Yerna tira tessefruy-d mliḥ awal.
Imyura : tenniḍ-d deg usarag neγ di tγimit n imura mi yebda weskasi belli imura s tefransit d taεrabt ttarun seg yiwet tugna neγ tamuγli tamḥerṣant, mačči am imura s tmaziγt amek iga waya ?
Cami-Abranis : i d-yerran s lexbar ala win yewwten d win yettewten. Akken s-qqaren zik-nni : tiyita ur d-nezgi deg-i mennaγ-tt di lḥiḍ. Si zik ar ass-a iεdawen-nneγ ttarran-aγ deg yidis, ḥesben-aγ am akken ur nelli. Attan tmuγli iss ttarun akk imura ama d wid n tefransit ama d wid n taεrabt. Di taggara n wawal, yal yiwen iḥemmel tayri n yemma-s (tutlayt-is).
Imyura : amek twalaḍ neγ d acu-t rray-ik γef wayen akk yeḍran dagi kra tekka tfaska?
Cami-Abranis : ayen yeḍran mačči d yiwet neγ d snat. Ad bduγ seg wayen yelhan. Timlilit-agi d tin n tayri n yidles, d tin n leḥmala n tegmat gar yergazen d tlawin. Seg wadeg γer wayeḍ, si taddart γer tayeḍ, imezdaγen mmugren-aγ-d s wudem yessefraḥen, tanemmirt tameqqrant. Ma d ayen i ẓriγ s wallen ur yelhi ara, d widak yebγan ad rren iman-nsen d igelliden, nutni d izamaren. Tagi teẓram-tt akk, segmi newwi timmunent-nneγ ar ass-a , d nutni i γ-yeččekkilen ur xeddmen ur ttağğan win ara ixedmen. Ur ẓrin ara aman-nsen ḥemmun (qrib ad mmten). Tanemmirt tameqqrant i widen d-yessuddsen tafaska-agi d wid yettekkan.
Imyura : acu ara sen-tiniḍ i yimeγriyen n isebtar Web n wadeg Imyura?
Cami-Abranis : ad asen-iniγ azul fell-awen akken ma tellam. Ur tettut ara, ma tḥemmlem atmaten-nwen init-tt i yimeddukal-nwen.
Tadiwennit,
Smaεil ε.