Anwa akken is innan ala ṭikuk id-icebbun di baba-s?
D acu ar aγ-d yini ma illa nesken as-d tikwal ṭikuk itekk nnig baba-s? Ugaγ ad issusem!
Ad isussem yerna ad ildi imi-s uma ildi imeẓẓuγen-is γef tikelt, ad isel daγen I uẓawan (musique) isefrawasen, ad isel I kra n tezlatin akken I tent-ibγa wul. Ad t-id-yaweḍ s ameẓẓuγ isel n taγwect n Belɛid, d tazurant, d tahrawant tzemmem γef ccna n ruk, tettfeggiḍ.

Ihi d Belɛid ar as ibeddlen I unzi yagi n ṭikuk anamek, ar as irwin nneyya I win ur nuḥtam izmer ad teḍru. Win iγillen timsal beddent u teddunt kan s wansay γer wayeḍ, xas tikli n wakud ur terbṛix, ad iwet γer walaγ ur t-ittaf m’ara igzu.
Amdan ikkat di tlufa is-d ibanen ffγent I iberdan. Maca, anwi iberdan? Anwa I isbedden ilugan id-iqqaren: abrid-a ilha, abrid-a diri-t? Anwa akka imi tefka tegnitt ad yini wagi d ccna nneγ wihin macci nneγ? Anwa akka erran iman-is d aqerru, u yefkan I yiman-is amrar ad yesfuti deg wid iṭfen abrid n ccna akken nniḍen? Ugaγ wigi yak d wid iskusbren di tzikennitt, yir ackunteḍ, zgan xebbcen deg iḍelli war ma cqan-d di seld-iḍelli, tura γef uzekka fiḥel awal!
I wigi yak yerra-yasen Belaid awal deg yiwet di tezltain-is imi isemma Rock:

Ur sellegh I medden ma nnan
Wagi ihbel iffegh I iberdan
Ur cqigh ma illa hedren
Nekki h’emlegh d Ruk n Rull

Belɛid d mmi-s n Karim n terbaɛt Les Abranis. Ilul di Tfilkut, yiwet di tudrin n lɛarc At Illilten, assegwas n 1976. Seg assmi d-ikker izga ccna deg uxxam nsen, ira-t si temẓi, ilmed-it si temẓi.

Deg iseggwasen-nni baba-s tuγ-it di tqacuct umecwar ines s tarbaɛt-is tatrat imiren Les Abranis. Di lakul, xas akken aṭas n wallen I izzin ar γur-s ‘mmi-s Les Abranis’ Belɛid illa kan d ayen illa: d ugzi, d uḥdiq u ar ass-a urǧin tuli-yas tmussni n baba-s s aqerru. I t-iceγwben d aẓawan ilhan u ittwef γef "POP MUSIC" n Marikan, m’ara ittmeslay fell-as as tiniḍ di Nashville I d-ikker. Issen akk icennayen n uẓawan "POP", issen tizlatin nsen yiwet yiwet. Maca, am akken I gan wiyiḍ, Belɛid ur ineggez ara ad ig ayen gan icennayen a I γef ittwet, ayen icennu ass-a d ayla-s, d ayen I d-yurew uqerruy-is. U d tagi I d tajmilt unaẓur, acku ad d-yeǧ amahil ittwaḍebɛen s yisem-is, ad isnerni idles-ines s weḥric amaynut. Akka illqnt tikta unaẓur nneγ amaynut.

Tasfift ines tamenzut, xas tedda akken iwata, aṭas ur nesli ara yis-s. Atentin ihi tezlatin illan deg-s:

Rock N Roll
Farida
Muqel-d
A tin
Ttuḥarmeγ

Ad t-ayya diγen tesfift nniḍen ad teffeγ ussan-a id-iteddun u ad awwiγ diγen fell-as awal u ma illa-d wamek ad d-awiγ ula d tadwennit yid-s.

Mack A.U.