“Tuddar qqiment d tilmawin
Σemṛent ḥaca s tilawin
Win yesεan ul-is d aḥnin
Lhem nnig wa ulac” Ccix Lḥasnawi, 1935.
Si Muḥ n Aɛmar u Muḥ ilul ass n 23 Yulyu 1910, di Taɛzibt n Lɛeṛc Iḥesnawen. Yettwassen s yisem Ccix Lḥesnawi imi laṣel ines n Iḥesnawen, di lekwaγeḍ yers s yisem n Muḥemed Xelwat. Asmi i yesɛa sin isegwasen di laɛmeṛ-is temmut yemma-s, akken kra isegwasen yerna baba-s. Am tizya-s akw di lawan-ni, yekcem ar temɛemmaṛt akken ad iγer leqwran. Ur yeqqim ara aṭṭas di taddart-is, asmi yesɛa 14 isegwasen iṛuḥ ar Tizi wezzu, dinna icennu di leqhawi, ur iɛeṭṭel ara di Tizi wezzu ikemmel abrid-is ar Lzzayer tamaneγt. Dinna di Lzzayer yemlal d kra inaẓuren imeqranen am Ccix Musṭafa Nadur akw d Ccix Mḥamed Lɛanqa.
Deg wsegwas n 1935 Ccix Lḥesnawi yessufeγ-ed tasfift-is tamenzut anda i yecna γef lγerba akw d wuguren n tmurt imiren, tizlitt-nni La Maison Blanche di tesfift-agi i deg tella. Yeqqim sin isegwasen di Lzzayer dγa di 1937 iṛuḥ ar Franṣa anda i d-yessufeγ tisfifin nniḍen. Di Franṣa Ccix Lḥesnawi yettwassen aṭṭas ger yeγriben i yellan din. Aṭṭas n yeγriben i t-iḥemlen imi icennu γef ayen i ten-iḥuzan, lγerba m lemḥan. Ccix Lḥesnawi yecna diγen γef tmeṭṭut n tmurt d wuguren i d-tettmaggar di lawan-ni. Xas akken tizlatin n Ccix Lḥasnawi wezzilit maca d tid igerzen aṭṭas, nezmer ad d-nini belli ibeddel-as udem i cna n caɛbi neγ yewwi-d amaynut i ṣṣenf-agi n cna. Asmi i tebda tegrawla di tmurt, di 1954, yeḥbes cna. Mi i tfuk di 1962 yeqqel ar cna, yerna 6 isegwasen dγa yegzem-tt di ṛṛay-is belli ad yeḥbes cna i lebda. Ccix Lḥasnawi yexdem 46 n tezlatin, 29 s Teqbaylit, 17 s Dderğğa (taεrabt n Lzzayer).
Deg iseggwasen n 70 ibeddel tamurt; abrid-aggi iṛuḥ γer Tegzirt n La Reunion. Di tegzirt-agi ikemmel tudert-is armi d asmi i yemmut ass n 6 Yulyu 2002. Xas akken Ccix Lḥasnawi yeğğa-yaγ, tizlatin-is mazal-iten ttwasnent di yal tama n tmurt.
Kra n tezlatin sγur Ccix Lḥasnawi
Tiqbayliyin
Ad cekreγ Tiqbayliyin
D ṭṭaɛa d zzin
Fell-akunt γennan ccuɛaṛa
A tijeğğigin n tudrin
A sser n tsekwrin
Deg ul tettağamt limaṛa
Lḥasnawi yettleḥḥin
Ɣef tgujilin
A kunt-iɛeyyec Ṛebbi meṛṛa
Ṣebṛemt neẓra
Ɣur-kunt lḥeq mebla lheḍṛa
Wexda ma ar a d-ɛeddint
Leğwahi tmeddit
Ad d-nejmaɛent deg lḥaṛa
Tin yesɛan lwali temmekti-t
Imeṭṭi d talwit
Ul-is irekb-it leḥṛaṛa
Teqqar-as lγerba tmelk-it
Ddunit tewt-it
Nṛuḥ nḍaɛ d lexsaṛa
Ṣebṛemt neẓra
Ɣur-kunt lḥeq mebla lheḍra
Ṣebṛemt neẓra
Ɣur-kunt lḥeq mebla lheḍra
Faḍma
Tenγiḍ-iyi, tezliḍ-iyi,
Tmeḥneḍ-iyi a Faḍma
Ssel-ed a m-ḥkuγ
Tenγiḍ-iyi, tezliḍ-iyi,
Tmeḥneḍ-iyi a Faḍma
Fell-am cennuγ
Ḥemleγ-kem, ɛecqeγ-kem
Lemḥibba-m tesɛa iẓuran
Deg ul-iw tuγ
Ḥemleγ-kem, ɛecqeγ-kem
Lemḥibba-m tesɛa iẓuran
Deg ul-iw tuγ
Σewzeγ uḍan, ttruγ i yetran
Am umehbul deg zenqan,
Di tderwec rennuγ
Tenγiḍ-iyi, tezliḍ-iyi,
Tmeḥneḍ-iyi a Faḍma
Ssel-ed a m-ḥkuγ
Tenγiḍ-iyi, tezliḍ-iyi,
Tmeḥneḍ-iyi a Faḍma
Fell-am cennuγ
Ttarguγ-kem,
Tasa-w tegzem
Deg ussu ttneqlabeγ
Mi d-ukiγ ruγ
Iṣɛeb-i waṭṭan
idammen-iw ṛγan
Ḥaca kemi i d ṭbib-iw,
Yissem ar a ḥluγ
Tenγiḍ-iyi, tezliḍ-iyi,
Tmeḥneḍ-iyi a Faḍma
Ssel-ed a m-ḥkuγ
Tenγiḍ-iyi, tezliḍ-iyi,
Tmeḥneḍ-iyi a Faḍma
Fell-am cennuγ
Tṛuḥeḍ Teğğiḍ-iyi
Tṛuḥeḍ teğğiḍ-iyi
Zewğaγ fell-ak ccah
Tṛuḥeḍ teğğiḍ-iyi
Zewğaγ ccah ccah
Nnan-iyi medden d amjaḥ
Ul-iw yugi ad yamen
Ɣileγ ad txedmeḍ leṣlaḥ
Qqareγ Ṛebbi ar di iɛiwen
Ziγ di Lbal tḥefḍeḍ cḍaḥ
Feṛṛeğ a gma nezzah
Di Lbal tḥefḍeḍ cḍaḥ
Ferreğ nezzah nezzah
Tṛuḥeḍ teğğiḍ-iyi
Zewğaγ fell-ak ccah
Tṛuḥeḍ teğğiḍ-iyi
Zewğaγ ccah ccah
Tnekreḍ lɛahd, tettuḍ
Teğğiḍ-iyi ttṛağuγ
Ttaḍṣan medden tṛennuḍ
Teqqareḍ-as ccah ad ternu
D leḥṛam fell-ak, tettγuṛṛuḍ
Awkil-ik mulana llah
Tṛuḥeḍ teğğiḍ-iyi
Zewğaγ fell-ak ccah
Tṛuḥeḍ teğğiḍ-iyi
Zewğaγ ccah ccah
Sinima d iṭaksiyen
Tezhiḍ am iḍ am ‘zal
Lukan d asegwas ɛamayen
A k-ṛğuγ a yaḥnin mazal
Σecṛ snin ttemsetbaɛen
Nnan-ak ṛuḥ tenniḍ bdda
Σecṛ snin ttemsetbaɛen
Nnan-ak ṛuḥ tenniḍ bdda
Tṛuḥeḍ teğğiḍ-iyi
Zewğaγ fell-ak ccah
Tṛuḥeḍ teğğiḍ-iyi
Zewğaγ ccah ccah
Ufiγ lbaz ar aγeγ
Netta yebγa-yi nekki bγiγ-t
Kkfan lehḍuṛ gar-aneγ
Ul-iw si lğiha-k nγiγ-t
Ul-ik di lγerba i yezdaγ
Yemmut af tmurt ur ineba
Ul-ik di lγerba i yezdaγ
Yemmut fell-i ur ineba
Tṛuḥeḍ teğğiḍ-iyi
Zewğaγ fell-ak ccah
Tṛuḥeḍ teğğiḍ-iyi
Zewğaγ ccah ccah