Lxuğa n Umengellat

Lxuğa

Anef iyi
Lxiḍ nsen wisen anda yexreb
Ur d-iban yixf-is
Ur neẓri leslak-is ansi iyeqreb
Ma ad yili bab-is
Ma ilaq a t-id nqelleb
A-s-nerr afud I yisem-is
A t nemâawan ad yebded
Nekwni a nelḥu di Ssuq-is
A-γ-yaru Lxuğa a-necḍaḥ !

Anef iyi
Am igujilen ad-twaliḍ
Yeggunin tawwurt
Anef iyi
Tebγiḍ ad-tetfeḍ lxiḍ
A-k-nefru takurt
Maεlic awid ad-telliḍ
A-γ-tsegmeḍ tameddurt
Neṭq-ed kan ad-aγ-tinniḍ
A-k-nerr d izem
Γef tmurt
A-γ-yaru Lxuğa a-necḍaḥ

Anef iyi
Si zik nesεa-t di lemtel
Nezga tuẓ kra
Anef iyi
Ur ilaq wayeḍ ur d-ilal
Wa ixus-it waya
Ma ulac ad nextir lefṣul
A ten-id nawi s-ya u s-ya
Yis-sen ar d-nebnu lefḥul
Ar aγ iṣegmen tagara
A-γ-yaru Lxuğa a-necḍaḥ

Anef iyi
Nugad tidak n yiḍelli
Ar γur-sent nuγal
Anef iyi
Nlehḥu kan ur neẓri
Nettabaε lexyal
Nettagwad leγdar n mmi-s
N wid iγ yerran d lmal
Atan ad aγ ččen imensi
Ad aγ d-ğen tarda n leḥwal
A-γ-yaru Lxuğa a-necḍaḥ

Anef iyi
Nettagwad a-nezgar asif
Ma yili yeqqur
Anef iyi
Nḥemmel a nezgar I wasif
Ma ar ad-yettawi ṭjur
Si zik i nessen a nessif
Nessen-as i uγerbal tikli
Alim yettawi-t waḍu
Aclim akk yid-es ar a-nali
A-γ-yaru Lxuğa a-necḍaḥ

Anef iyi
Xas ur nxus deg wallen
Nxus awali
Anef iyi
Xas deg wawal d atmaten
I tegmatt melmi ?
Yeqwa ugessar d usawen
Tban-aγ-d amzun terwi
Neγli-d deg rebbawen nwen
A kra i (g) εzizen γef Rebbi
A-γ-yaru Lxuğa a-necḍaḥ

Anef iyi
Nessawal akk anda ṛuḥen
At lehdur s lqis
Anef iyi
Nugad ad-yilli ggugmen
Mkul wa d lahlak-is
Nettawal mebla isγaren
Ur yeεqil ḥed aγsim-is
Neγli-d deg rebban nwen
A kra zeddigen ur yumis
A-γ-yaru Lxuğa a-necḍaḥ

Anef iyi
Ama yella neγ ulaḥed
Yak nezga kif kif
Anef iyi
Imγi nneγ
Ma yeğuğeg-ed
Iqubl-it urif
Ma yella ma sṣaba tban-ed
Ilaq a-tt-nemgar s nnif
Anda tellam neṭeqt-ed
A wid izuzufen lḥif
A-γ-yaru Lxuğa a-necḍaḥ

Anef iyi
Si zik ur aγ d-iṣaḥ kra
Nqebbel tilas
Anef iyi
Si zik nefreq i nebḍa
Wa ur yeddi d gma-s
Yak qqaren ak di lfetna sṣaḥit
Ay izem aγilas
Ahat yeεya lhem tura
A-kwen-ğen
Ma yella teddmem ayla-s
A-γ-yaru Lxuğa a-necḍaḥ

Anef iyi
Mači ala ayagi i-d-nenna
Ulawen ččuren
Anef iyi
Nettḍarif kan di tlufa
Alami nuḍen
A win id-igren nnehta
A-d-teskker wid imuten
Llah lḥed ay atma
Ma ad zwireγ d iγ isṣawḍen
A-γ-yaru Lxuğa a-necḍaḥ


(I-tt-id-igren ar da d Mack A.)