Win yewten yinn-as d tiyita i rriγ, win yerran tiyita innena-s d ambaṣi, ini kkren γeḍmen tara-s, d tagi id ddunit n wass-a, ur temgarad iqiḥ γef tin n yiḍelli, yezga d win yeγwlellin imi tεedda lhedṛa, win iεebban azaglu erran fell-as timedlin.
Iḍelli s tin n yiγil win izemren i wayeḍ yečči-t, yr yelli din nniγ-ak tenniḍ-iyi, am lmal deg teẓgi, uzmir yawi-tt, ass-a ttzuxun s tγerma, qqaren d imagdayen, nutni d times n ddaw tmurt, ṭṭfen iγmisen, arnan "leqmen-aγ tiṭ deg tlemmast n tγerγart"¹ akken yeqqar akken winna deg awal-is, tura nuγal d izamaren anda i bγun nerra, akken d-nnan nnini "ih".
Llan wid msakit yeṛwan lmizirya alma dayen ur ttawin ara, ini begsen-d γer tnekkra, din ad affen duga duga wid a ten-yawin d webrid ara ten-yarzen ugar, neγ ara ten-yarren am yemcumen-nni i γi d-kkren, aṭas imedyaten i yellan akka deg umezruy:

Tagrawla i Bulcibiyen aseggas n 1917 di Russ, medden seg akken fuden tilelli, seg akken i yella usirem ad seγlin adabu ad yali yiṭij nsen, ur zṛin ara akk i ten-ittrajun d wid i nwan d tidett d "igrawliwen".

1933, Dduyčland neγ ayen mu neqqar "Lalman", agdud yebuti, yefren win ara t-yawin 6 iseggasen ardeqqal ar weεric, tṛad umaḍal wis-sin yegla-d s ugar n 40 melyun n imettanen, d tawaγit! d nger!

"Ccah" (agellid) n Iṛan yexdem i yessen deg ugdud-is, asmi i yeγli agdud yesbedd Ccah nniḍen s učamar deg umḍiq-is, d tiderwect!

Tikkewal amdan yedderγel wallaγ-is, yettayes, ḥemmun idamen-is, "ur izeṛ tigert nnig wanzaren-is"² alama yufa-d kan iman-is deg ubaxix ara yeglun yes-s.
Aṭasaya tura aqlaγ kan din, amezruy d tazayert, tilufa zerrin-t, ar γurneγ am akken ur ḍerrin-t





1- Σmeṛ Mezdad deg "Ass-nni", zeṛ diγen Ğuṛğ Uṛwel deg "1984"
2- Tanfalit Tafṛansist.