I tura ?!!


Aγbel n tnekkit d win n wuγrum
Win tḍefṛeḍ, wayeḍ ad ak d-i-sawal
Allaγ εerqent-as, ur yezṛi abrid ara yawi
Nessaram, am akka, taεkkemt n wuγṛum ad tifsus, ad nelhu d tin n tnekkit.
Tinekkit ur negzim, ur neṛṛiz, d tin ara yeğğen bab-is ad ihḍer, ad iddu, ad ixemem u ad isnulfuy wer akukru, wer aleγwi, tamuγli ar yimal kan ara treṣṣi, acku teddiḍ deg uzzerig umezruy-ik,  tettmeslayeḍ tutlayt-ik ,
Immir-en ad iqqim weγbel n weγṛum, winna yeshel d amennuγ yedda-d i umdan deg twenza-s deg ass-en id yeγli ar ddunit, d ayla-s yezzemr-as.
Yuεaṛ m’ara yettenaγ yiwen netta ulac-it di ddunit, amezruy ur t-issin, talsa ur d txezzeṛ s ayla-s. nekkni asmahit d waydeg inella tura, aṭas ur nḥulfa ara i twaγit id a γ d-iteddun, ha yerna-ten umennuγ n wuγṛum, ur s-zmiren ara yakk i wayen nniḍen, ha ur cliεen ara, ad ten-tafeḍ deg arbaε-nni "ečč a yayul azekka ad a nruḥ", tugett deg-sen lewhi nsen ar idlisen n beṛra, sseqdacen timeslayin n medden ladγa Tafṛansist ; ar γur-sen d tagi kan i izemren a d-tini ayen yettxemim wumdan, yerna d tamslayt n tussna, d tiknuluğit, ihi ulamek ad sqedcen tin n yemmat-sen, nettat yemmuten tεawed.
Tamussni n tutlayin tiwardaniyin mačči d lεib (issefk ad nissin tutlayin nniḍen), lεib ticki ara tessiwḍeḍ ad tissineḍ u ad tettaruḍ akken ilaq s tutlayt tawerdanit, tameslayt-ik yeḥwağen asnerni (akken ad tedder) ad as d-teziḍ aεrur , a tt-tḥeqreḍ, yettγiḍ lḥal !! m ara naf d akken sin gar imyura nneγ imeqqranen, Kateb Yasin d Lmulud At Mεameṛ, iswi n leqdic nsen, idlisen-nsen akk d tuγalin ar tmeslayt n tyematt, γas akken sqedcen Tafṛansist, ar taggara uγalen-d ar wayla-nsen ar tmeslayin n wugdud ( teγzi n tmeddurt nsen akk fkkan-tt i waya).
Win yettarun ayen ur yegezzi, ur yefehhem tugett n wugdud, iwacu-t !
Acḥal ass-ayi i ifehmen Tafṛansist neγ Taεṛabt takklasikit deg tmurt nneγ ?
Asmahit ur ttawḍen ara 30% !!, tasekla ur nelli d taftilt i wegdud ur nemmal abrid i wegdud, ur s-iheddṛen s tmeslayt-is i wegdud, i wacu-tt ? i wumi-tt ?
Asmahit llan wid a d-yinnin d akken imyura ladγa wid yettarun s Tefṛansist, kkaten γef agdud, kkaten γef izerfan n wugdud, d tidett, yella-tt wakka, dacu ur d teqim ara kan deg waya, tuγal d taluft n nnger neγ n tudert .
Ar melmi ara nesεu tameslayt am nekkni am wiyaḍ, ar melmi ara nuγal d imdanen am nekkni am wiyaḍ, ddunit n tura tezreb, akud iteddu, idlisen seffḍen, timeslayin neggrent .
Ma ladγa d nekkni ara d i-tt-agmen ssem s ifasen nneγ, dayen tfukk ddunit !

Amesdrar