D tallit tamaynut i d-yufraren γef wedlis s teqbaylit, ugar n 300 n yedlisen  i d-yefγen seg 2004 ar assa. 2004 nezmer ad nini d aseggas i deg tebda tettbeddil tegnitt, γas akken mačči atas n yedlisen i d-yefγen deg useggas-nni, iseggaseni d-yusan zdat wwin-d aεwin yid-sen. D acu i ibeddlen d wamek tbeddel? Tamezwarut ilaq ad nesmekti i wakken ad yidir wedlis yesefk ad ilint tezrigin ad yessufγen ayen ttarun imyura iqbaylawalen akken a sen-sawḍen idlisen-a i imeγriyen i ten-d-yessuturun. A neεreḍ a nwali dacu yellan deg wannar γas ulamma ulac γur-neγ akk  ismawen n tezrigin d iqeddacen nniḍen.

Tizrigin, akken i ten-nessen di tmurt nneγ, nezmer a tent-nebḍu γef kkuz(4) n leṣnaf :
- Tizrigin i gant ahil nnsent i wedlis kan, tidak n tdukkliwin, tidak yettefγen d ddemma n umeskar akk d tidak n « useqqamu unnig n timmuzγa » (HCA).
Si tmezwura nezmer ad nebder l’Harmatan, la Découverte, florus…atg i s-yefkan azal i wedlis aqbayli di kra n tallit akken, ladγa ma neẓra belli ixammen n tezrigin am ti ur ṭṭawalent ara deg usufeγ n wedlis ma yella ur ilehhu (yettnuzu) ara …di ssuq.
Tizrigin-a d idlisen sin-utlayen  i ttmenyifent akka am wedlis « timsal » n Yusef Allioui...γas akken kra deg-sen s teqbaylit kan i ten-is-ssufγen am wungalen n S. Zenia d D. Benεuf ("iγil d wefru", "timlilit n tγermiwin")  γer l’Harmatan. Nezmer ad nebder daγen tizrigin Baγdadi, Berti, tizrigin Azur daγen di tneggura-ya.
 Maca iban-aγ-d am akken mazal-itent ttkukrunt ad sufγent ayen yettwarun s teqbaylit, aya nfehm-it kra imi lsas n tezrigin agi d lfayda, d adrim. Zemren daγen ad ḍefren abrid n wacḥal n tezrigin nniḍen s usufeγ n “yedlisen” n usewwi d teḥlawatin. Di tallit i deg ur yezmir yiwen aγ-d-yini ma s tidet llan aṭas imeγriyen s teqbaylit neγ d targit kan.
- Ṣṣenf wis sin n tezrigin d tid n tdukliwin neγ tid n tmeγnest am Numidya di wihran (sufγen-d γef umedya idlisen ‘’ Romeo d juliet’’, ‘’lemmer ad yuγal zzman’’). Talantikit d Ayamun nezmer daγen a ten-neseddu di ssenf agi imi ur llint d tizrigin tunṣibin maca ttalalent wid yettarun s teqbaylit s umata (‘’Yir timlilit’’ n H. Butliwa , ‘’Ass-nni’’ n A. Mezdad d imedyaten n wayen sazergent).
- Ṣṣenf wis kraḍ ur nettεeṭṭil ara deg-s; d win n usufeγ γef ddemma n umeskar. Yessefk ass-a asizreg am wa ur yettili ara, zik d tidett, tettuḥettem γef bab-is ad yessufeγ adlis γef ddemma-s, acku ulamek iga akken nniḍen, maca nwala laεyub awk i d-yettawi usezreg agi, γef umedya ur yettili ara useγti n wayen yettwarun (ama d tikta ama d tajeṛṛumt) , yettban-ed dakken d leqdic n umeγnas, seg wul i d-yekka , deg-s aṭas nniya maca neẓra ass-a belli adlis mačči d taγawsa kan ḍegger-itt-id  ad taf amkan-is di ssuq d webrid amek ara t-aγen imeγriyen, d tizrigin tunṣibin i zemren ad xedment ayagi mačči d amyaru s yiman-is , yewwi-d lḥal ad yaru kan ad yeğğ ayen nniḍen i bab-is.

TASLENKIT IDLISEN NNEΓ
Ṣṣenf aneggaru d tizrigin n useqqamu unnig n timmuzγa.
Akken twalam (wid yellan di tmurt neγ wid  yunagen ar tmurt aseggas-a), aṭas n yedlisen i d-yefγen tagara-ya. Tuγ tikli ar zdat, taqbaylit tebda tettufrar-ed di tmurt-is ger warraw-is, i warraw-is, s warraw-is.
Aseggas yezrin (aseggas n 2005), ugar n 150 n yedlisen i d-yefγen ahat. Ur rriγ ara leḥsab maca ṭṭuqten, dayen i d-yettaken asirem.
Tikti tamenzut i yellan s deffir wahil aki d asezreg n wayen yettwarun s tmaziγt, win yebγan ad isezreg adlis at yefk i Hca a t-walin ma yuklal, atan dγa a s-sufγen azal n 1500 n wudmawen, akka meqqar ur yettγimi ara yeffer, yiwen ur t-yessin, aya yettak tabγest i yemyura ad aγen  abrid n tira.
Γef umedya, ma yella neṭṭef Amyaru, atan amek i yezmer a t-iεiwen HCA :

-  A s-xelṣen  idrimen n tizrigin (tizrigin les oliviers, tizrigin Hasnaoui M., tizrigin l’Odyssee d tiyaḍ) i isufeγ n wedlis.
- Ad ferqen azgen ameqqran n yedlisen γef  tdukkliwin tidelsanin akk d temkarḍitin i wakken a yettwassen wemyaru-nni.
-  Azgen n wudmawen i d-yeggran, a s-ten-yefk i wemyaru-nni ad iẓer acu ad yexdem yis-sen.
-  M’ ara s imel wemdan adlis–is i wexxam n tezrigin nniḍen ahat ur ttkukrun ara aṭas akken a s-t-id-sufγen  m’ ifat yella yettwazreg-as wedlis, ma yella γur-s udem icebḥen, yettwaṛeṣṣa akken iwata. Ayaki awk u ad yaf lḥal daγen snent imeγriyen, acku idlisen n HCA akken i d-nenna d asawen-a ttakken-ten i  tdukkliwin, i iγerbazen akk d temkarḍiyin.

Mi yebda HCA « taslenkit idlissen nneγ* » yessufγed azal n 18 n yedlisen kan, maca ayen i d-iḍefren s-deffir, llan ugar n 150 n izewlen i d-yettefγen yal aseggas.
Yernu ttwarun akk s isekkilen n tlaṭinit, ayagi yeskanay-ed dakken taqbaylit tefren isekkilen ines, tuγalin ar deffir ulac.
Taqbaylit bdan ttarun yis-s ugar n 100 n iseggasen-a. Seg imenza ar wid n wassa, awk seqdacen isekkilen n TLAṬINIT.

- Taneggarut, asezreg n yedlisen s teqbaylit yessaγ tanumi i imeγriyen imaynuten a ttwalin tira n tutlayt nnsen di yal amkan. Ass mi ara aγ-steqsin anida tella tsekla nnwen, ur nettbeddir ara timucuha d tmedyazt kan γas ma azal nsent ur yezmir hed a t-yenker, imi taqbaylit di tazwara d tutlayt tamiwant, maca kul yiwen yezmer ad yebder ayen yeγra, ama d ungal, d amezgun, tullizin neγ ayen nniḍen. Ihi ass-a, d tikerkas ma yella yiwen yenna-yawen belli ulac imyura s teqbaylit neγ ur ugten ara yedlisen yettwarun s tutlayt nneγ: ala win ur nebγi ur yettwalin ara. Ger wungalen d tullizin fγen-d isefra d yedlisen n tmucuha: yal imeγri d tal timeγrit ad afen ayen ḥemlen a t-γren.
Negra tamawt dakken fγen-d yedlisen izwal nnsen d tamedyazt, ungalen, tullizin, wiyaḍ d timucuha akka am ‘’Acu iγ-d-nnan ger yetran’’ n Ḥalima aït ali Toudert, Ahmed Hamadouche s wedlis-is ‘’Tiγri n umesdrar’’,  Abdelhafid Kerrouche ‘’Teγzi n yiles‘’; Ramdane Ouslimani i d-yuran tudert n  ‘’Akli Ungif’’. Ğamal Hamri s ‘’Agerruj n teqbaylit’’. Ungalen akka am ‘’Ḥmed n Ugellid’’ n Ali Makour (imu ssan yeγsan di talwit)...atg. Tisuqliwin n yedlisen yettwarun s tutlayin tiwerdanin akka am ‘‘mmi-s ugellil’’ i iga Musa Uld-Taleb, Habib-Allah Mansouri s tsuqqilt-is ‘’Ageldun amectuḥ”, Slimane Zamouche i yuran ‘’Inagan’’. Mohand Akli Haddadou i yuran ‘’1100 izerismawen imaziγen’’.

- D agaruj fuγef ay –ḍallen yemyura n teqbaylit…nessaram ad uggten yemdanen am wi’. Awi-d kan ad ttefγen yedlisen akka! Umreγ aṭas s wahil-nni i d-sbedden di HCA: m’ ara tkecmeḍ deg temkarḍit ass-a, yella wacu ad tafeḍ ad teγreḍ-t γef teqbaylit. Yella wayen ad taγeḍ ma yella tḥemleḍ taγuri s tutlayt nneγ. Asebγes i sen-ttaken i yemyura imaynuten (llan ula d iqburen) dayen ifazen aṭas.
A nesnemmer mass Yusef MERAHI (amaray amatu n HCA) imi d netta i ibedden γef teslenkit-a seg  mi tebda.

_{*collection idlisen nneγ.}