Ass n 19 di yunyu d amuli n tmettant n Umeẓyan Mhenni. D amuli n wass I deg iγli wanza deg yiwet di tzenqatin n Paris mi ittnaγ wass d yiḍ.

Ass n 19 di yunyu d ass usmekti, d ass I deg imawlan ḥwaǧen γer idisan nsen wid ara isbγsen deg sen, wid ara ten iẓemden ar tama nsen u ara sen yinin, xas tasa n tyematt ur tsel ara, igra-d usirem ar zdat.

Maca d acu usirem is iqqimen I win iccan mmi-s? Amek ar a tessusem tasa, amek ara iffegh uqbar aɛebbuḍ n win imi kksen tarwa? Tiririt attan ak γef imawen : ulamek?
Maca ass n 19 di yunyu ad iqqim d ass gar ussan isennin amezruy n ugdud nneγ, a wi yufan yuki d yiman-is!

Ass n 19 di yunyu aγ yuγal d arẓagan, d ilili m’ara ikfu imeṭṭi d usmekti. Acku macci d tikelt macci d snat I nettwet, I nettwargem, I nettwasusef di tmurt nneγ I deg nuγal deg dis. Ula d aγyul-nni n babat nneγ u jedd nneγ I nerkeb zik ar deffir tura yuγal ur aγ d-isaḥ ara. Acku tamettant n Umeẓyan macci am tiyiḍ, tiyita ittwet tessekfel-d ayen I nγil neǧǧa-t ar deffir, acku tiyita yagi ur d-tusa ara kan akka, tekka-d s uffela tettwawzen, tettwahegga.

Ferhat, baba-s n Umeẓyan, s umssu n timanit isken-d abrid I ugdud azwaw, ibda issakway-d deg-s akken ad yelhi d imal, ad ilhi d uzekka. S umahil umi iger irebbi Ferh’at, agdud nneγ ad yakwi d yiman-is ad yerr tiyita d lada, u d aya I γef iγli Umeẓyan imi gzan aḥaruq iǧǧan imawlan, ladγa Ferḥat baba-s.

I tura amek? Ass-a ad d-nesmekti, ad t-nru. A nerfed fella-s awal ziḍen, a nawi ijeǧǧigen γer wanda iγli d wanda ittwanḍel. I sakkin ? A nettu am akkken nuγ tanumi? Ad d-neγḍel igenni s tqemmuct? Neγ ahat a nerr iman-nneγ am akken ur d-iḍri wacemma akk, ur ifli uyeddid ur nγilen waman? Ahat yifit akka imi nezga nreggwel I tlufa war ma nefra tent.

Mi nettwet a nru, mi nru a nesfeḍ imeṭṭi, mi inesfeḍ imeṭṭi a nettu. D acu ar aγ d-iqqimen? D assmi akken nettwet, d assmi akken nettru d assmi akken nettu. Wanag limer ur aγ-tewwit ara tatut yir tiyita, Ameẓyan macci d amenzu umi kksen tudert u, a wen t-id iniγ si tura, yerna teẓram-t, macci d aneggaru. Si Kamal Amẓal ar Umeẓyan macci d yiwen I iffγen seg iqerra nneγ. Acku win ittewten u γef akken ad yerr tiyita isendi iman-is I tayeḍ ur ittali ara, ur isuddus ara timsal akken iwata u annecta illa-d γur-nneγ si zik n zik nni.

Ma d tura sarameγ Ameẓyan ad isgunfun, ad istaɛffun iγessan-is u ad t-id nettadder ar zdat ala deg ayen ilhan. Imawlan a sen-d-yazen tabγest d waffud Bab Igenwan.

Mack A.U.