Yiwet n dduṛt kan segmi i d-tεedda di Oṭṭawa-Hull, taceqquft tamaynut n Aεrab Sexi ‘’Ass n unejmaa ’’, tewweḍ-d γer tγiwant n Montréal anda tessefreḥ yal win i d-yusan yeẓra-tt. I tikkelt tamezwarut di Montréal, deg tzeqqa ‘’Patro le Prévost’’, i d-yezgan di ‘’7355 Christophe Colomb’’, teččur dayen kan ; deg wakken mačči d yiwen i d-yusan ad ẓren ‘’Ass n unejmaε’’ ur tettafeḍ ara amkan anda ara teqqimeḍ.

Wid yesedduyen amezgun AAA (Amezgun Amaziγ Amaynut) gan akk tazmert-nsen d wayen sεan d allalen i wakken ad sferḥen wid i d-iruḥen s tuget ad walin ‘’Ass n unejmaa’’, i wakken diγen ad uγalen s tikti belli ass n 13 yunyu 2009, d ass adelsan urğin ad t-ttun.

 

Imariren ula d nitni ferḥen imi aṭas imeshaniyen i d-yusan (ugar n 350) ad walin tacequft tamaynut. Ferḥen diγen imi iban yeεǧeb-asen nezzeh, imi wten affus segmi tebda armi i tekfa. Di tagara n tceqquft ladγa, imeshaniyen bedden ttṣerfiqen ugar n snat n dqayeq.

Am akken ass n sed-agi tameddit, yefka anzi s yiman-is γer “Ass n unejma”. Amek i d-uraren yimdewlen, arnu-yas tadlegt n tcequft i yettwaxedmen akken iwata, yeğǧa wid i d-yusan ad ddren azal n kraḍt (3) swayaε amzun akken deg yiwet n lqahwa n taddart i deg llan. Taddart-nni anda i d-lulen d wansi i d-ruḥen. Deffir ukunṭwar ad as-tinit d lqahwa n ṣseḥ : a naf yakk tugniwin n kra n win yellan d azamul n tmurt n Iqbayliyen am JSK, JSMB, Maεtub, Lunis At-Mengellat d Sliman Σazem.

Tebda tceqquft, akken i d-tella deg ahil, s yiwen n wawal unekcum afessas sγur yiwen n imḍeber n umezgun AAA anda d-yuγal γef tlalit-nni n tlalit n umezgun-a, u iheder-d γef yiswi ines. Yesnemmer yal yiwen i d-yefkan afud i wakken taceqquft-agi ad taweḍ ar tagara n ussufeγ-is, mačči dayen isehlen. Yefka-yas daγen tannemirt i unazur Lunis At-Mengellat imi i d-yefka ttesriḥ i wakken ad tili yiwet ger tezlatin-is (Ass unejmaε) d aẓawan unekcum n tcequft.

Γef acu i d-thedder tceqquft-agi ? Kullec yebda m’akken xemsa ger setta ijmuyaε n taddart mlalen-d di lqahwa n taddart, wigi d :
 Dda Yidir (Arab Sexi), d aselway n tejmaεt, u d netta i d bab n lqahwa ;
 Dda Muqqran (Ḥusin Tulayt), d anemhal uγerbaz n taddart ;
 Ccix Meẓyan (Brahim Benammar), d limam n taddart ;
 Lḥaǧ Alemmas (Ḥakim Abdat), d amuqran n taddart, illan d aṛetriti ;
 Mennad (Nuredin Bala),d yiwen ilemẓi i d-yeffγen si tesdawit.   M’akken ttrağǧun aεeggal wis-6 ad yernu γer unejmaε, ttqeṣiren, ttmeslayen γef wayen akk i ten-iceγben yal ass. Annect-a yella-d s wurar n duminu, s tisit n latay d lqahwa, s umeslay s tmedyazt lqayen anda d-temlal : taḍsa, leḥzen, inecfuyen-nsen, smektayen-d zik d temẓi, d tmuγli-nsen γef wayen ttidiren, d wayen d-iteddun. Azal n tlata swayaε, awal yezzi γef tmetti taqbaylit d wayen yeffren deg-s : ama d ayen n diri, ama d ayen yelhan, am tugdut i ddren lejdud-nneγ acḥal n leqrun send igduden nniḍen.

Deg akken yal yiwen deg imariren yurar-d adwil-is s wudem igerzzen, ayen yeğğan imeshaniyen ad fehmen tanefsit d lεeqliya n yal deg-sen. Ama d Lḥaǧ Alemmas, am lḥeǧaǧ akk i nessen di yal taddart n Iqbayliyen, win yesεan tiktiwin tiquranin isebken deg yiwen n wemkan kan. Lamaεna ssya γer da yesewham medden s ṣṣwab imeslayen-is, d tiktiwin-is iweqmen. Ama d Ccix Meẓyan, limam aqbayli i yellan d bu ṣṣwab i tedun d tikli n zzman, mačči d win yebγan ad yer medden γer tallit-nni tineslemt taqburt, am akken nettwali di kra n temnaḍin nniḍen di tmura tinselmin. Si tama nniḍen, Ccix Meẓyan d limam aḥeqani ur nessexlaḍ ara timsal n ddin d tid n ddunit, akken i llan lejdud-nneγ si zik xeddmen. Ama d Dda Muqqran anemhal n uγerbaz n taddart i d-ileqḍen azalen n uγerbaz afransis, wala Mennad, d anelmad di tesdawit i d-yussan s tiktiwin timaynutin, i yessaramen ad d-iṣuḍ ubeḥri atrar di tmetti n Iqbayliyen. Tagara d Dda Yidir, aselway n tejmaεt d win yellan daγen d bab n lqahwa, i yettaεraḍen amek ara yessemsawi timuγliwin d tiktiwin yemgarraden. Amedya, tid n Mennad d Lḥaǧ Alemmas ur neqbil di tazwara n unejmaε i wakken anelmad n tesdawit ad yetteki deg unejmaε-nsen, imi γer γur-s mazal-it d aqrur amecṭuḥ, yerna, ur yeqbil ara kra n temsal timaynutin i d-yewwi s annar unejmaε am tugdut ladγa.

Lḥaṣun imeshaniyen-nneγ msawan d imariren akken iwulem lḥal. Ssya γer da, kkaten-asen affus yal tikelt ara yekfu yiwen deg imuraren isefra-s iwenεen. Ssya γer da, rrwan taḍsa yal tikkelt ara ten-id-sseḍsen imariren, ladγa yal tikkelt ara d-yehder Lḥaǧ Alemmas. Ssya γer da, ad ssusmen yiwet n tsusmi, ula d izi ad s-tesleḍ ma yafeg, d tasusmu i d-iḍefren isefra yeseqraḥen ulawen i d-isekfalen ayen yellan deg-neγ d wayen i γi-qebren nekkni s Iqbayliyen.

Mi tekfa tceqquft, imshaniyen bedden, wten affus nezzeh i yimariren, tebεent-ten-id tiγratin n tlawin. Mi tekfa tmezgunt, imariren ffγen-d berra n tzeqqa, qeṣren yid-sen yemdanen, snemmren-ten. Asteqsi n imsehaniyen di yal tikkelt : i melmi ara d-tuγalem i tikkelt nniḍen ?

Tameddit n 13 yunyu 2009 di Montréal d yiwet n tmeddit tamezgunt taqbaylit n tidet, ur tettun ara wid i d-yusan. “Ass n unejmaa” ur temgarad ara γef yal tamezgunt tameqqrant i yellan di yal tutlayt n umaḍal, deg umezruy n tẓuri n umezgun agreγlan.