Ass wis sin n tfaska, asihar yettunefk-aγ γer taddart tagrawalt Iγil Imula akken a nwali tamezgunt n tekrut Asirem i γ-d-yusan seg Iεeẓẓugen. D takrut d-ilulen deg useggas 1990 deg Wexxam n yelmeẓyen n Iεeẓẓugen. Seg εeddan 5 iseggasen, kecmen Tiddukla tadelsant “Tasuta tatrart” anda d-ssulin Muḥend U Ceεban (wis sin) n Muḥya. Ssin akin, Racidi Malik d umeddakel-is εalam Ṣami, ssuqlen-d γer tmaziγt tamezgunt n umaṣri “Amakur n weṭruli” umi fkan azwel “Wa d sidi, wa d agdi”. Takrut tura, teggra-d deg Wexxam n yedles n Iεeẓẓugen anda tufa iman-is akken ilaqa. Ilaq a d-nesmekti d akken takrut tewwi 4 warrazen seg useggas n 2002 γer 2006, ihanayen-nsen εeddan-d di Lezzayer tamanaγt, Ḥasi Mesεud, Bumerdas, tisdawiyin d temnaṭ n Leqbayel s umata.
Tameddit nwass akk imezdaγ n taddart d inebgawen n tfaska nnejmaεen-d deg yiwen wannar iheggan i waya akken ad walin ahanay. D tamezgunt yura Racidi Malik d-yekkes seg yiwet taγect n terbaεt umi qqaren GAB yuran s kraḍ tutlayin, azwel-is “Anwa i d bab n wexxam, anwa i d aγeddar”, teεǧeb aṭas i yimeshanayen γas akken tesruy… D taqṣiṭ i d-yecrew seg umezruy amiran n tmurt-nneγ, texbec-d ccfawat-nneγ n wussan-nni iberkanen asmi irebraben n yal tuddsa sseγlin-d iḍ deg uzal, ayagi, akken yiwen ur itettu. Racidi Malik, mačči kan d amaru maca daγen, asali n tmezgunt d tikti n tedlegt d netta, ma d amahil, am akken nnumen, s twizi.
Asirem d takrut yebnan γef 7 izeffanen d arrac, tis 8 d taqcict. S tin n leḥdaqa, a d- nezwir si tzeffant Yaḥwi Lidya iγef nezmer a d-nini, si tama, urar-is γef tencirin usayes terna i weḍris lǧehd, si tama nniḍen, tesmekta-yi-d d tebγest n tulawin-nni yelḥan di tikli n 22 meγres 1994 di Lezzayer tamanaγt asmi akken tugdi tezdeγ ulawen. Ma d izeffanen nniḍen, yal yiwen s yisem-is : Mibani Ḥmed, Waliti Yusef, Waliti Smaεil, Qasi Ferḥat, εeddan Xaled, Racdi Karim, Aṭani Kamel, ad asen-nini tanemmirt tameqqrant. Acku tamezgunt-agi, d ahanay yefkan abeqqa i tatut deg ukud-agi n tsusmi…
Tuggett n izeffanen ttekkan deg isura amedya “Si Muḥ U Mḥend” d wiyaḍ… Ilmend n taggara, d awal n Malik acku yesseḥres aṭas akken ad yesnemmer akk wid yettεawanen takrut war ma yettu imeddukal-is iruḥen, ula d nitni εettben. Tiγri n tekrut i wid i izemren ad εiwnen acku tamezgunt-agi d asenfar bγan ad tt-id-ẓergen d adlis d usekles-is di tesfift am usaru.
Akk takrut snemmren adeg Internet n “Imyura” di Internet, ferḥen s tilin-is acku yettaru ḥala s tutlayt tamaziγt. Ssaramen daγen ad ilin « yemyura » d ajerriḍ n tuqna gar akk imaziγen n wemḍal.
Smaεil εebdenbi