Jean Luc d axeddam di lbiru, zzher ines annect, ar ad
ak-inin wid i wumi d-tṣaḥ tberwiṭ d lmesha deg ucunti, iṭij azal qayli iṭṭerḍiq,
netta, ahbuh ! Jean luc yessekcam-d ikelyanen ar yiwen n usensu annect:
ittqessir d lγaci, yessafag-asen tifawtin, imiren, “anṣuf yis-wen” γef yimi. Amεellem
ines itteεğab-it lḥal d axessar!
Ittnekar-d ssbeḥ zik, itessew lqahwa, ayefki s temẓin
d cikula, aγrum s wudi (ithellay di tεebbuṭ-is akken iwata!)… Itbadda zdat n
lemri azgen n tsaεett, ad iqεed acekkuḥ-is,
tabluzt-is d tekravaṭ ines, ur
ilaq ara ad ixṛeb kici hağa, neγ ma ulac ad yetqelleq wergaz: ahat ur
itteεğab ara i Aurélie. Nettat yakan txeddem akk yid-s.
Mi i d-yeγleq tawwurt, anaba: ul-is yebreq, ajurni
yebda!
Rtaf, rtaf, ad d-iṣub skali, atan deg ubulvar… iteddu
amzun d aεsekri… tura la yettazzal, d tazzla, diriksyu tamacint.
Yeṭṭef amiṭru, iwwet-itt d ibeddi, ajeṛnan deg
yiffassen-is. Teḥbes tmacint, rrsen kra, ulin-d wiyiḍ, netta mazal-t d ibeddi.
Yuzzel-d Mulud, dγa yeεfes-it, γas akken ur
as-yeεmmid ara. Jean-Luc ur
t-iqal ara, irked-it s tmuγli, irrfal-it s wallen: “Ahat d yemma-k i yissirjen isebbaḍen-iw leεca agi?!”, ihedder weḥdeskan…
anda-k a ssmaḥ?! Llaεb aṭas ulac-it γer Jean-Luc.
Yers-d seg umiṭru, ad ibeddel wayeḍ. Yettazzal,
yettazzal… abeḥri yekkat lfista ines γer deffir, takṛabat-is la tceṭṭeḥ, tekkat
akin akka, tikelt s aqadum, tikelt txenneq-as amgarḍ… Mi t-walaγ uγalent-iyi-d
ccfayat nni n wasm’akken netturar “Tibahatin”, taqcict aqcic, nettemyeḍfar,
nettemyefk tibahatin, deg wennar lmadrasa… I wagi, niγ imeqqer! La yetturar
wehd-s neγ amek?
Tewweḍ-d tmacint nniḍen, idess cwit, yufa amkan…s
yibeddi! Aha nanaaaγ!
Ass uxeddim, d ass yecban imyyaten nniḍen.
Taṣebḥit. Anyir ikres, ad yesγam iman-is di lbiru
ines, tiflewt la tberren di lqahwa taberkant… ciṭ kan
akka, … čren, čren, čren, bdan isawalen! D tasikritirt n mass Bidault,
tettnadi-yas amḍiq n ciṭ umeṭreḥ i diriktur ines, la tettḥawat di Jean-Luc ad
as-d-yeğğ cwiṭ di ssuma, netta awwah!
“Nniγ-am meyya d meyya, ma ur
am teεğib ara ssuma, llan isensuyen nniḍen!” s-yenna, wemcum. Sin, tlata,
setta, tlatin isawalen nniḍen, abujur n lehdaqa takellaxt di tazwara; εeddi
imiren ar umcekkel γef umesṛuf, asteεfu ulac.
Di sya γer da, yetteεraḍ ad iqesser cuya d Aurélie, nettat
s wecmumeḥ tettarra-yas-d awal, yettecmumuḥ ula d netta, γas akken γer daxel yeẓra
kullec d akellex. Aurélie nettat ur
tekkat ara akin akka, lwelha-s truh γer Bruno, yiwen ugayar isserbayen di lbar,
ttemyecmumḥen, nettat tḥemmel-it, netta iḥemmel-itt, iiiih wi! Azγal agi, ma
yebγa weḥnin, tameγṛa s yiḍebbalen ar ad tili… ma d afeṭṭiwej nni n Jean-Luc, ur
d-yecqi wul-is deg-s madi.
Mači d lmektub-ik a kuzan!
Xemsṭac isawalen nniḍen mbeεd, tewweḍ-d tmeddit. Izemm
tawwurt deffir-s, ixaq ad yekcem s axxam, ad yarcibi ass n wass agi deg tbewwatur
d-yettaf ula d Freud… Di tmacint, anyir ikres diγen, yessikid di lγaci… di čekčuka
n wass agi, iqqim-as-d lferḥ mi ara tessikiden lγaci, tilawin d yergazen (abeεda
tilawin!!!), deg wul nnsen(t) yenwa qqaren(t)-as: “d axeddam i yella wergaz
inna lεali, ad iḥrez Ṛebbi timital-is”…“Iiiih,
d axeddam ay lliγ, anεam iiiiih a Mummu, ziiiiik ay d-kkreγ nekkini a zzin!”…
Werεad isellek ttexmam, imi tewweḍ tmacint lṭurna, ur
yehtam εwjent tqejjirin-is, iruḥ-as lmil, yeγli wegaz… Aγebbar, lexmağ, ssyiεqa… yezweγ wudem-is umeγbun. Mamadu
yerwa fell-as taḍsa, netta d Vanessa, lγaci nniḍen la ssikiden deg-s kter…
yerra γer daxel-is, tessevleε-it lqaε!
Di cmandeffir ar wayeḍ, yiwet n tmacahutt: tazzla tetveε
tayeḍ, lxiq, inizman d wurfan… acu d lmaεna n ssirk agi, εddi kec fhem-it.
Efk lehna i yγsan-ik, ma tenwiḍ ad tidireḍ!
Sγur Lεaziz Belεid